كتب - محرر الاقباط متحدون
وجه الاعلامي احمد سالم، رسالة جديدة، عبر حسابه على فيسبوك، بخصوص مستخدمين فيسبوك الذين يفسرون المنشورات الخاصة بالاخرين بكيفية غير صحيحة، وجاء بنص الرسالة :
عزيزي المواطن اياه علي الفيسبوك. .....
لازم تعرف أن :
مش كل بوست له مغزى آخر أو معني غير مباشر إلا لو انت عايز تفهمه كدة.
مش كل حد حاطط دعاء يبقي عنده مشكلة إلا لو انت متعود تلجأ لربك في الأزمات فقط.
مش كل حد كاتب عن صلة الرحم يبقي عنده مشكلة عائلية إلا لو انت متعود علي كدة.
مش كل حد كاتب حاجة عن غدر الأصحاب يبقي قصده عليك إلا لو انت علي رأسك بطحة.
مش كل واحدة كاتبة عن الخيانة يبقي جوزها خانها، ممكن تكون بتتكلم بصفة عامة بس خيالك المريض صورلك كدة .
مش كل حد كاتب حاجة عن أمور الدنيا يبقي بيلقح كلام علي حد معين إلا لو ده اسلوبك في حياتك.
مش كل حد كاتب عن الحب يبقي عنده علاقة سرية والا توقف الشعراء عن قصائد العشق.
مش كل صورة لها معني ولا مقصود بيها نغيظ حد إلا لو ديه اخلاقك.
مش كل واحدة بتتعامل بتلقائية وبساطة تبقي ست سهلة إلا لو انت اللي مش محترم.
مش كل حد ماعملش لايك أو كومنت علي صورتك أو كلامك قصده يتجاهلك أو يضايقك إلا لو ده اسلوبك مع الناس .
مش كل حد ينزل اغنية يبقى معجب بكلماتها وبيوجه رسالة الي حد معين ويمكن يكون معجب باللحن وبس إلا إذا كان كل واحد قام بتأليف الاغاني لحسابه وعلي مقاسه، باختصار سيب الملك للمالك وربنا يصلح حالنا وحالك.
