كتب - محرر الاقباط متحدون
اندلع حريق بكنيسة الأنبا بيشوي بالمنيا الجديدة، اليوم الثلاثاء، ويأتي الحريق بعد مرور ايام على حريق كنيسة إمبابة الذي اسفر عن وفاة ٤١ شخص .
وتمت السيطرة على الحريق بكنيسة المنيا دون وقوع إصابات، وقالت وزارة الداخلية ان الحريق نتج عن حدوث ماس كهربائي.
وكتب المفكر والطبيب خالد منتصر عبر صفحته على فيسبوك، معلقا على هذه الحوادث :
الخلاصة،زي المسلم ما بيبني المسجد وهو مش خايف ولاحاسس انه بيرتكب جريمة،المسيحي برضه يبني الكنيسة بدون خوف،كده الكنيسة تتبني صح وبدون " كروته" وبكود أمان منضبط،ومش باحساس يالله نخلص قبل ماحد يشوفنا،من دلوقتي الكنيسة حتتبني في النور والدولة سمحت وبتسمح وبتساعد وبترمم القديم،وكنيسة التجمع تبقى زي كنيسة كفر الغلابة،كله واحد،مش عايزين تمييز ديني ولا طبقي.
ولازم باب الكنيسة يبقى واسع ومفتوح على الشارع بحرية ،لازم نرتقي ونتحضر ، عشان مشاهد الحراسات الرهيبة دي قدام الكنايس دي يبقى بدالها ورد وفل وياسمين ، امتى دور العباده عندنا مايبقاش عليها حراسة ؟؟امتى نوصل لهذا السمو اللي بنشوفه في دور العباده بره ؟! الانسان بيدخل من أجل السلام النفسي مش بعرض الحرب ولا المعركة.
امتى نتعلم ان ربنا مش محتاج بودي جاردات ولا بلطجية ، جل جلاله هو اللي بيدافع عن الناس مش الناس هيا اللي بتدافع عنه، لازم نعقل ونبطل جهل وتخلف وحشر مناخيرنا في شئون الآخرين ،ونترك كل واحد وعلاقته مع ربه يسويها بطريقته ، هو اللي حيتحاسب مش انت .
يوم ماحاشوف باب الكنيسة مفتوح ع الشارع زي أيام ثورة ١٩، ومش محتاجة حماية لاننا كلنا بنحميها ، لأنها ملك المصري قبل المسيحي والمسلم والبهائي واليهودي، يومها حاعرف اننا فعلاً دخلنا التحضر والحداثة من أوسع أبوابها.
