أيوه كلنا نتيجة عمل إرهابي

*لما الأقباط على أرضهم بقوا  يفرحوا بالفتات علشان يبنوا لهم حتة كنيسة  مخنوقة بمنافعها   وفي حارة  ضيقة  من غير أي معالم  ولا أي وسائل للحماية والآمان  رغم ان دا مش طبيعي ..يبقى دا  نتيجة لعمل إرهابي  مستوي على نار هادية من سنين ..

 

* لما  تتأخر عربيات  الإسعاف والمطافي القريبة من الحدث بعد مايتخنق العدد المخيف دا من الضحايا  وتترمي الجثث في الشارع مش لاقية اللي يشيلها لأقرب مشفى  ويجري كل الأهالي الجدعان  يعملوا المستحيل   وحدهم  وما حدش ساعدهم  . يبقى دا  نتيجة تخللي وتقصير  واستهتار اللي هو  بالفعل مرض  إرهابي متعتق من سنين ..؟! 

 

*لما يجري الشباب  ولا البلد المصريين بحق   ويعرضوا نفسهم للموت لانقاذ أي من الضحايا  ويلاقوا الأبواب  مقفولة حسب  مانشر بلسانهم ..  يبقى  فيه  تساؤل  مشروع ..

 

* لما نفضل  نمدح  ونهلل  ونقول المسلم أنقذ  أخوه المسيحي ،  وتركز الكاميرا  على جارة محجبة  محروقة من البكا  على ولاد جيرانها  من الضحايا  ونقول أنها مسلمة  عظيمة  وكأن دا مش طبيعي  وأنه استثناء  ..كدا أنت  لغيت إنسانية وإحساس الناس الطيبين  تماما  ..وبتؤكد  أن  فيه شرخ .  هو دا كدا سبق اعلامي مثلا  ..!  ..دا في حد ذاته  سم  إرهابي  ملا شوارعنا دخان خنقنا كلنا  من سنين ..

 

 * لما نستكتر  على بعض أبسط حقوقنا كبشر أسوياء نحزن ونبكي  ونستفسر  ..ونستكتر على الناس  المكلومة تغضب  من ربنا   وتلومه  وتسأله ليه ..  وتزعل من العدرا وهم في فترة   صيامها .. ونقولهم  كدا  حرام .. يبقى دا نتيجة  جهل والجهل عمل إرهابي  شوش الأدمغة  من سنين..  سيبوا الناس تاخد حقها في الحزن والغضب .. سيبوهم يفضفضوا ..

 

*لما الناس تحاول تلاقي اجابات لتساؤلات كتير حتى لو غلط   يبقى لازم نعذر  مخاوفهم وشكوكهم  ماهو تاريخ الإرهاب معاهم   ترك في الذاكرة جروح  ماتتنسيش   ..

 

*لما يطلع إعلامي يهرتل  ويقول أن الشمع في الكنيسة ممكن يكون  هو  سبب الحريق  .دا كدا  تفسير  حضرتك   نتيجة  تشويه ذهني   إرهابي غبي بامتياز  اتزرع في الأدمغة من سنين ..

 

*  لما يطلع شوية أقباط غلابة   في قرى الصعيد  اللي واكلها الفقر والقهر  ويتبرعوا لبنا مسجد لمجرد يتقوا شر محتمل أو لاثبات حسن النية يبقى دا  نتيجة  خوف  إرهابي  شارب  مرارته  الطرفين  من سنين  ..

 

*بتلوموا على الكنيسة أنها خالية من آية وسائل  حماية وأمان .. طيب هو مين في شوارعنا الضنك   متحصن بالحماية والأمان والكرامة ..مين فينا سليم ..لما يبقى الفساد   والعنف  والذبح في الشوارع بين الشباب وداخل البيوت  نفسها  هو أسهل قرار  وبلا  خوف ولا وازع  ولا رادع ..يبقى دا  برضه  مش  نتيجة  تعليم وبث وتخريب  إرهابي استهدف الحاضر لينهي على المستقبل  تماما ولا إيه ! 

 

*  مش لازم  تطلع منظمة  مؤمنة  تعلن  بفخر  أنها ورا  حادث احتراق  أو تفجير  أو أي  جرم  ضد الأقباط ..لأن الألعن  والأخطر  اللي بيمارس إرهابه  وسموم  قلبه  بهدوء  وهو في مكانه ..وهو  في وظيفته .. من على منبره.. من موقع مسؤوليته  حتى لو كان في دكان بقالة ..بالظبط زي المجرم اللي يفضل يساعد أهل الضحية ويدور معاهم  على الضحية  وهو اللي قاتل ..

 

* اوعوا تفكروا أن الأقباط هدف لوحدهم ..للأسف التخريب دمر الشارع كله ..الشر  طال الكل .. طلوا  كدا بقينا فين يامصريين  وإزاي ..  يكفي بس جسور الخوف و سوء الظن  اللي زرعها زعماء  الإرهاب نفسيا وذهنيا في  كل الأجيال ..والكل   بيدفع التمن حتى لو كان الاقباط هم  وش القفص ..

 

ياعزيزي  كلنا  بقينا سلوك  فوضوي  غير مسؤول  وغير إنساني بالمرة ..كلنا نتيجة فكر  إرهابي  وضيع و فاسد  اتسلط على اروحنا  لما بقينا مش طايقين بعض .. وللاسف  فلح ..

من المسؤول عن تسليم الشارع المصري  برخص التراب لمرارة الفكر والإجرام  الإرهابي وقاعد يتفرج علينا واحنا  كل يوم بنموت ..

.