د.أمير فهمى زخارى المنيا
يحدث فتق السرة عند الأطفال عندما ينتفخ جزء من الأمعاء من خلال الفتحة الموجودة في عضلات البطن والتي تكون قريبة من السرة...
المقال ده عباره عن محادثه بين الأم والطبيب بخصوص الفتق السرى عند الرضع...
الأم: لو الطفل عنده فتق سرة ، نلبسه حزام بطن ولا نلف رباط ضاغط وتحته جنيه ولا نحطله لزقة سرة ولا نعمل ايييه ؟
الطبيب: لا إنت متعملش حاجة خالص .
الأم: إزاي يا دكتور دا كل الناس قالولي البسه حزام ، وكمان الدكتور فلان قاللي كدا و فلان كان ابنه عنده فتق واختفي بعد استخدام الحزام ،،،،،.
الطبيب: استخدام حزام البطن أو الرباط الضاغط ليس له أي علاقة بعلاج فتق السرة دا علي العكس تماما أحيانا بيسبب اختناق في الأمعاء لما تطلع في الفتق وتتحشر تحت الرباط ومحدش وأخد باله ، وبتوصل أحيانا لدرجة الغرغرينه.
الأم: طب نعمل إيه؟
الطبيب: والله متعملش حاجة ، اغلب حالات الفتق السري بيختفي علي سن سنتين وكمان في بعض الكتب بتقول نستني كمان بعد سن سنتين.
الأم: آيوه بس الواد بيكبر والفتق ذي ما هو مش بيصغر .
الطبيب: المفروض الفتق بيبدأ يصغر بعد سن ٦ شهور لأن دا السن إللي الطفل بيبدأ يتعلم يقعد وبالتالي عضلات البطن بتبدأ تقوي والفتق يبدأ يصغر.
اطبلأم: حاجة تانيه ، الواد الفتق عنده بيكبر والسرة بتتقلب لبرة ذي الصباع أعمل إيه؟
الطبيب: دا بالذات بقي ميلبسش حزام ، لأن إللي بيطلع في الفتق دا امعاء... الطبيعي تطلع لما العيل يعيط وترجع تاني لما يهدي أو ينام واحتمالية اختناقها ضئيلة لكن لو لابس حزام ممكن تتخنق تحت الحزام ومحدش حاسس.
الأم: طب شوف بقي ، الواد طول الليل والنهار بيتألم منه ومش بينام.
الطبيب: لا حضرتك مش بيسبب أي الم ، في الأغلب دي إنتفاخات أو مغص والفتق برئ ، الخلاصة الفتق السري سيبوه في حاله وبإذن الله هيختفي لوحده من غير ولا مشاكل ولا عمليات.
الأم: طيب إمتى يكون فيه جراحه؟
الطبيب: هناك حاجة إلى اللجوء للجراحة، وذلك في بعض الحالات الخاصة كما يأتي:
- وجود ألم شديد في المنطقة.
- انتفاخ واضح في المنطقة لا يتناقص حتى بلوغ الطفل لعامين أو أكثر.
- عدم اختفاء الفتق حتى بلوغ 5 سنوات.
- حدوث احتباس في أنسجة المنطقة.
متعكم الله بالصحه والعافيه...
د.أمير فهمى زخارى المنيا
