ظهرت خلال الساعات الماضية أزمة جديدة في اختبارات قطاعات الناشئين، بعد استعراض أحد الناشئين لتجربته في العجز عن اللحاق بعدة فرق دون توضيح أسباب واضحة.
وتعود الواقعة إلى اللاعب زكريا مجدي، الذي يمتلك تجارب في الدرجات الأدني، كان منها فريق الزرقا والذي قرر الرحيل عن صفوفه بعد أن طالبته الإدارة بمبلغ 8000 جنيه لاستمرار قيده.
وخاض اللاعب خلال الفترة الماضية تجارب الاختبارات في عدة أندية مثل الترسانة والبنك الأهلي، خاصة أنه حوّل محل إقامته من محافظة سوهاج إلى الجيزة.
وكتب اللاعب عبر حسابه على موقع التواصل الاجتماعي «فيسبوك»: «اللي بيلعب معايا وبيشوفني عارف مستوايا ولعبي عامل ازي، بقالي فترة كل أسبوع بروح اختبار وبترفض من غير أي سبب رغم إني ببقي حلو.... بس مبعرفش أنا بترفض ليه؟؟؟ في اللي بشارك بيهم وفي اللي بسكت مبتكلمش».
«بس اللي حصل انهارده حبيت أشارك بيه علشان يظهرلي كل سنه وأشوف قد إيه إحنا عندنا تعصب بطريقة فظيعة.. كنت ف اختبارات نادي البنك الاهلي ف ملعب المحروسة الساعه ١٢ ظهرا لعبت حلو أوي وعملت اللي عليا واكتر ف العشر دقايق اللي لعبناهم».
«الكابتن بره كان بيصقفلي من غير م يعرف اسمي ولا أي حاجة عجبته وأشاد بيا بعد الماتش نده عليا انا واتنين، واحد كان في فريقي والتاني الفريق اللي ضدي واللي بيروح اختبارات عارف إن لما الكوتش بينده عليه ويمشي الباقي يعني كدا هو اتقبل».
«طلعنا معاه بره نسلم على الكباتن اللي قاعدة تحت الشمسيه الحلوه دي.. ف الكباتن بتشيد بينا وبيسلموا علينا بكل احترام، الاتنين اللي معايا اتمضالهم الاستماره واتقبلوا وخدوا معاد الاختبار التاني».
«جه الدور عليا بص ف الاستماره وسكت شويه وقاللي معلش تعوضها ف نادي تاني.. قولتله يا كابتن الاتنين اتمضالهم اللي كانوا قبلي...قاللي معلش تتعوض ف نادي تاني».
وعبر اللاعب الصاعد زكريا مجدي عن حزنه الشديد بسبب عجزه عن الانضمام لأحد الفرق رغم تجاوزه المراحل الأولى من الاختبارات.
وقال اللاعب الصاعد لـ«المصري اليوم»: «دايمًا يتم اختياري في الاختبارات ولكن عند توقيع الاستمارات يتم استبعادي دون إبداء أي أسباب».
وواصل: «المرة الأخيرة كانت اليوم في البنك الأهلي بعد اختياري رفقة 2 آخرين للتوقيع على الاستمارات بعد النجاح في الاختبارات، تم الاعتذار لي دون توضيح أسباب».
وأضاف: «المرة السابقة كانت في نادي الترسانة قبل أيام، وتم اختياري أيضًا ولكن عند توقيع الاستماراة فوجئت بالاستبعاد».
وتواصل محرر المصري اليوم مع خالد جادالله رئيس قطاع الناشئين في نادي البنك الأهلي.
وقال جادالله: «الاختبارات تتم بشفافية كبيرة ووضوح ولا يوجد أي فرصة للتلاعب أو المجاملات، والاختيارات تتم على أساس القدرة الفنية والتألق داخل الملعب».
واستمر: «أقدر مشاعر الشاب وأوجه له دعوة للاختبار مجددًا يوم الثلاثاء وسأقوم بمشاهدته بنفسي».
