الذكوريات الحلوات

 هوجة  الاعتداء  على البنات غير المحجبات ( باختلاف العقيدة وإن كان للمسيحيات نصيب الأسد ) زادت وتوحشت وفجرت  واستهترت بهيبة القانون 

 ولما يبقى البلطجي والفاجر  واحدة ست يبقى  لازم  نتأكد من فداحة المصيبة اللي  طفحت  بشوراع المحروسة..

 

لما الست تفقد أنوثتها  وتختتن في رقتها  وتغتال حياتها تماما وتخزل  في  كونها مجرد عورة  فطبيعي جدا  تتحول لكائن وحشي  عدائي  لا علاقة له بالستات خالص 

 

الذكوريات  دول ياسادة  مجرد  رد فعل وسلوك  تلقائي  ونتيجة طبيعية ومنطقية  لكل  تشوه ثقافي  وانحراف فكري وتربوي غرس  فيهم باعتباره من صحيح الدين ..ولأن الجهل طاعون  دمر  عصب المحروسة  فلازم تسود الانتهاكات  

 

ودي مش مجرد حالات ..لأ..  طالما غالبية  الشارع  بيؤيد ويبارك  أفعال  التعدي  يبقى احنا بنتكلم في عقل جمعي مش مجرد أفراد..

  السؤال ..أنتو  مستوعبين  يعني إيه أغلب ستات مصر بقوا ذكوريات وبالقبح دا  ..انتو مصدقين حجم الكارثة اللي بقت في شكل شوارعنا ..

مين اللي وصلهم للمصير الأسود دا ..مين اللي حولهم من أناث  إلى  كتل بليدة بلا كرامة ولا قيمة  ولا عقل ولا أخلاق  ولا حياة ..

فين جاذبيتك وأناقتك ورقتك  ياللي كنتي ست الستات ..فين  خطوتك  المتزنة  وصوتك المهذب  وألوانك المبهجة .. فين تميزك ونجاحك  ومهاراتك وشجاعتك ..فين حضارتك وتاريخك  ياللي كنتي بيضرب بيكي المثل ..

 

بقى هو فيه أنثى  في الدنيا  بكل ملامح الغضب دا  ووقاحة العيون دي وهرتلة الحيز دا  ومعتدية وتسب  وترازي  مخاليق الله  وكمان ترفع الشبشب على بنات جنسها  إلا إذا كان جوها  بركان غباء  مابيهمد  من  كثرة  ماتعرضت  له من قهر مجتمعي وديني متراكم  ومركز معاها وعليها  بس ..طبيعي لازم تنتقم ...

 

  حضرة الصيدلي والمؤمن المحترم  اللي من مكارم أخلاقه  إيده سابقه مخه  معتديا  بالضرب  على وجه قبطية لجأت له بالصيدلية لمجرد أنها  من دون حجاب وف رمضان  هو دا مش يؤكد أن الثقافة  غير الإنسانية  مابتفرق بين مستويات التعليم  ولا بين  رموز الفكر والفن والثقافة  ولا  بين أهل المناصب والريادة   كلهم  كذبة  وبنفس تقوى العقلية منتهية الصلاحية  

 

الأصابع  كالعادة  بتشاور على دعاة وشيوخ الوهابية  ..تمام ..بس حتى دول  هم أول الضحايا  وأول الخربانين . دول  اللي بادروا   وفتحوا التراث المعتم  فوقعوا  فوق بعض  جوه  كراكيب  التغييب  والارتباك  والتناقض وزرعوا  بالتخويف  الفكر المنحرف  في كل شبر بشوارع المحروسة مستغلين الجهل المريح .. 

 

والحجة  اليتيمة  الموثقة بالتراث  هي من رأي منكم منكرا ..طيب ياسيدي ..هو الاعتداء بالضرب  والألفاظ  الخارجة   على الآمنين  مش  منكرا برضه .. هي تلال القمامة اللي في الشوارع مش  منكرا ..هو سرقة الموازين  و الغش في السلع الأدوية  وفوضى الشوارع والتسول والسرقة ووخطف الصغار  والكدب  والرشاوي والكراهية   مش  منكرا برضه .. هو عدم احترام القانون  وفرض محاضر التصالح  لصالح المعتدي مش تعتبر  شهادة زور  ومنكرا برضه .  ولا المنكر  مختص  بس على النص كم وديل الحصان ونلم الليلة المفتوحة  دي  واللي بلا رادع ..

للأسف في مرحلة العيب العيب مابقاش عيب ..

 

لأ .هيبة  سيادة القانون فوق كل  شيء  مهما بلغ شأنه  ..دي دولة مش زاوية ..