كتب - محرر الاقباط متحدون ر.ص
تداول رواد مواقع التواصل الاجتماعي منشور لحساب باسم (ماريان توفيق) اتهمت خلاله سيدات بالتعدي عليها بالسب والضرب داخل عربات السيدات بمترو الانفاق وجاء بنص المنشور :
من يومين كنت فى المترو ركبت من محطه روض الفرج رايحه العتبه ،، طلعت عربيه السيدات لاقيت رجاله قاعده فيها واحنا واقفين علقت وبقول مش دي عربيه سيدات بس فالراجل قال بجد قولت اه اعتذر وقال هنزل المحطه الجايه قولت تمام وابتسمت .
لاقيت الست اللي في الفيديو دي بتقولى خلاص بقي هما قاعدين قولتلها لا مش هينفع دي قوانين ، قالتلي طب هما مش هينزلو فأفتكرت أنهم تبعها بقولها لا لو انتي تبعهم ممكن تنزلى معاهم وتركبو اى عربيه تانيه لكن دي مخصصه للبنات بس ،، قالتلي لا يابنت...... وشتمت بقولها انتي بتقولى اي لاقيت بنتها جريت عليا تقولى انتي بتكلميها كده ليه يابنت .... وهي كمان شتمتني .
بدأت انفعل وبقولها اي اللي بتقوليه ده وبزعق لاقيت بنتها بدأت تمد أيدها عليا وتقولى جري اي يا مسيحيه يابنت ال.... وشتيمه بقي من أقذر مايكون وبدأو الاتنين يضربوني ومعاهم اتنين كمان برضو قرايب والاربعه بلا استثناء كل واحده مسكاني من حته وبيضربوني ، ولأن أنا لوحدي مابقتش عارفه ادافع عن نفسي قصاد مين فيهم، بقيت بزق برجلى اللي اقدر عليه وسط ماواحده ماسكه شعري والتانيه بتضربني علي ضهري والتانين نازلين طلتيش فيا فى اي حته يلاقوها فيا، بتضرب من محطه مسره لحد العتبه والناس بتحوش وحد بيصور لحد ما باب المترو فتح ولاقيتهم نازلين نزلت وراهم وروحت للشرطي اللي فى المحطه وانا منهاره وهو طلعنا للظابط اللي فوق ، كل ده كانت مشكلتى فرديه مع واحده متخلفه عادي حصلت وبتحصل وهتحصل.
اللي مش عادى بقي أن كل الظباط بلا استثناء كانو بيتغطو عليا عشان ماكملش واعمل محضر صلح واسيبهم يمشو ،،، اتقالي بكل الطرق اسكتي ( تهديد اني هبات في الحجز رغم أن أنا المجني عليها، التسامح يا ماريان دانتي المفروض بتتعلمى التسامح، ازاى يعني هحتجز ناس معاهم اطفال ، ماريان زي مانتي هتعملى محضر بالواقعة وهتقولى أنهم ضربوكي هما كمان هيعملو محضر فيكي انك ضربتيهم، استني بقي نعمل المحضر الساعه ١١ ولا ١٢ عشان محدش موجود،، قالو لاهلي اني هنزل الحجز اتضرب واتبهدل وهما مش هيسكتو وهطلعهم واحده تانيه ،، واني كمان هروح حجز بولاق الدكرور ) .
فضلنا في الكلام ده من الساعه ٥ للساعه ٨ تقريبا وشويه ، كل ده عشان عايزه حقي اللي ماعرفتش اخده لما شتمتي وضربتني وبالمناسبة قالتلي أنا جوزي ظابط يابنت الو...... وهتشوفي هيعمل فيكي اي يا مسيحيه يابنت ال...... عملت اي ؟؟؟ اتنازلت فعلا ومضيت ع الصلح وانا مش مرضيه بربع جنيه.
مضيت وانا زعلانه ومش عايزة اسامح حد فيهم لا هي ولا اللي معاها ولا الناس اللي في الصور دي لان حرفيا كلهم كانو واقفين معاها ضدي لمجرد اني مسيحيه.
أنا لو قولت أن مشكلتي مع واحده جهله مش فاهمه وخلاص المسامح كريم ،، طيب والشرطي ؟؟ والظابط ؟؟؟ وكل الرتب اللي كانت وقفه !؟؟ كلهم جهله ؟؟
واضح أن من كتر ماقولنا بنحب التسامح والمحبه والشهر الكريم نسينا اننا بنتوجع ونتهان ومش بناخد حقنا.
أنا مضيت غصب عني عشان كل حاجه حواليا كانت بتقولى اسكتي ،، بس اقل حاجه اعملها اني اسيب البوست ده هنا ويارب الناس كلها تشوفه وتعرف كل واحد هنا علي ايه .. ومش خايفه من حاجه.
