كتب - محرر الاقباط متحدون ر.ص
ابدى الداعية الازهري عبدلله رشدي، اعجابه بمطعم كشري التحرير لمنعه اسرة مسيحية من تناول الطعام في نهار رمضان، داخل احد فروع السلسلة.
وكتب رشدي عبر صفحته على فيسبوك :" من الطبيعي أن تحترم سياسات المكان الذي تتواجدُ فيه، وليس من المقبول أن تفرض فكرتَك على سياساتِ المطعم!.
وفي اطار هذا، شدد الاعلامي شريف مدكور، على رفضه لتشدد بعض رجال الدين دون ذكر اسماء ، وقال :" من واجب رجل الدين ايضا ان يعزز السلم المجتمعي، ويخمد الفتن لا ان يصب عليها الزيت.
مضيفا في مقطع فيديو عبر صفحته على فيسبوك :"
اي رجل دين تعامل بطائفية مع طفلة مسيحية او مطعم قالها مفيش اكل في نهار رمضان، احب اقوله مفكرتش ان لهذه التصرفات تداعيات ؟.
موضحا :" الطفلة الصغيرة دي هتروح الكنيسة وتقعد في وسط الاطفال اللي قدها في العمر وتحكي عن تعاملك معاها.
وتابع :" هتقولهم انا دخلت انا وماما مطعم والراجل طردنا وقالنا مفيش اكل هنا احنا في صيام، مفكرتش شكلنا احنا المسلمين هيبقى ايه وقتها !.
ورأى :" أكيد الاطفال هيقولوا : هما ليه المسلمين بيتعاملوا معانا بالشكل، وهيخافوا مننا، والدين الاسلامي معلمناش اننا نخوف الناس منه.
مشددا :" بل على العكس فالدين الاسلامي مشتق من السلام، ويدعو للتسامح كما طالب المسلمين بالتقرب من البشر وعدم النفور منهم.
وكانت كتبت سيدة تدعى سيلفيا بطرس عبر حسابها على فيسبوك :" نزلت النهارده جبت بنتي من الحضانة، كان عندها تمرين روحنا جري على هناك وباباها خلص شغله وعدى علينا، بعدما خلصنا بنتي قالت أنا جعانه، قولنا فرصه واحنا بره نعدي ناكل أي حاجه، وبما اننا صايمين ولقينا مطعم كشري شهير في القاهرة ، وشغالين قولنا ناكل ونروح،، قعدنا وطلبنا وجه الاكل، ويادوب البنت بتاكل أول معلقه لقينا واحد من العاملين جاي بيقول ممنوع الأكل قبل المغرب.
قولت له يعني ايه ؟!!! مش ده مطعم ومفتوح والناس قاعده ،، قالي اه الناس تقعد بس محدش ياكل قبل الآذان !!!!، قولت له انت صايم ومستني الآذان براحتك أنا مش صايمه للمغرب وقاعده في "مطعم" والأكل قدامي ازاي ماكلش، قالي هو ده النظام !!!! ولقينا واحد تاني جاي غالباً مديره وبيكرر نفس الكلام.
وتابعت :" ف احنا بقى مطلوب مننا نطلع معلقة الأكل من بق البنت ونقنعها انها ماتاكلش في المطعم علشان فيه ناس قرروا يفرضوا ده على غيرهم ؤ هل الصيام بالعافيه حتى على المسيحيين ؟!. ولا هو علشان كتير الواحد بيراعي شعور اللي حواليه فبقى حق مكتسب ونتعاقب لو عملنا العادي أو بنتي جاعت واحنا في الشارع ؟!!.#الصيام_بالعافيه.
مضيفة :" تعديل: المطعم بيرد على ناس من اللي اهتموا وبعتوا لهم اننا اخدنا تيك اواي، وان التيك اواي ممنوع يدخل الصاله وده سبب المنع مش الآذان ، الفرع اللي كنا فيه الصالة منفصلة عن مكان الطلب.
كما اضافت :" انا وبنتي دخلنا قعدنا وجوزي دخل يطلب ولما لقى انهم بيحطوا الأكل في علب على انه تيك أواي قال لهم احنا قاعدين في الصاله هل فيه أي تكلفه زياده علشان ناكل هناك ، وكان الرد لأ يافندم مفيش اي حاجه زياده اتفضلوا .
موضحة :" ولما جوزي جاب لنا الاكل وبدأنا ناكل حصل اللي انا حكيته فوق وقالوا ممنوع قبل الآذان وده بالمناسبة اللي بيأكدوه هم بنفسهم على صفحتهم.
وتابعت :" لو سبب المنع هو التيك اواي زي ما بيدعوا، كانوا حتى عرضوا انهم يبدلوا الأكل في أطباق او يطلبوا فلوس زياده للخدمة وده ماحصلش، يعني لو كنا قعدنا واستنينا بعد الآذان كنا اكلنا عادي في العلب اللي بيدعوا انها سبب المنع.
