٥+١  = صفر  
ماجدة سيدهم
الهوجة   اللي حصلت  مع حلقة الست نعيمة مسداري  وحالة الإنبهار والدهشة  بسبب شبع وعفة النفس اللي  جواها   

 بتؤكد   ان   ٥+ ١ = صفر

* فيه جملة  خطيرة في فيديو  لأحد الأباء وهو بيقدم للست نعيمة  شاشة  ولما قالت بعفوية" مش عاوزة حاجة "
.رد عليها بتلقائية " دا اللي هانطلعك فيه "

الحقيقة  بقا إن الست نعيمة هي  اللي طلعت لكوا  وطلعت لنا  كلنا ..وهي اللي وسط  الزحمة دي كلها   بتسألنا  السؤال .. أنتو مين ..وعرفتوا باب بيتي منين  ..وإيه الزحمة دي كلها  وكنتوا  فين قبل كدا ..!

نعيمة  مسداري  مش محتاجة حد يطلعلها  من شاشة ويرص مواعظ  ويرتب  طقوس .. لأنها بكل بساطة قدمت  للملايين وعلى الملأ  أروع وأصدق  كرازة  وعظة  مايعرف يقولها أعظم لاهوتي  ..

 والحكاية  يادوب مجرد  سؤال  لكن نتيجته كانت صفر ..

أيوه  سقطنا كلنا .. سقط  السبت  ..  سقط الكبرياء ..سقط رجال الدين ..سقط الصفوة ..سقطت الأقنعة  ..سقطت المؤسسات الاجتماعية ..سقط المجتمع كله  ولم ينجح أحد ..

أيوه المجتمع بقا قاسي وكاره  وشرس .. ورغم أن كلنا  مجروحين لكن  للأسف  بنستخسر   نجبر خاطر بعض وكأننا بنشمت  من جوانا  في ألم  وهزيمة  بعض ..

نعيمة مسداري  كشفت  أد إيه إحنا جعانين لجبر الخاطر ..

 جبر  الخاطر جوه البيوت وفي الشارع وفي والعمل وفي المعابد.. جبر الخاطر في الصراخ  والسكات ..ماهو ماحدش هايجبر  خاطرنا غير بعضنا ..
. نخبط البيبان  ونقدم عيش حلو ونضيف اسمه جبر الخاطر ..

مش محتاجين  نتسابق  ونشيد ونقف  في الصورة جنب الست نعيمة .أحنا محتاجين  نقف  أدام  المرايا ..