مشعلوا الحرائق وصور من أزقة العالم الثالث هما اسمان لمسرحيتين للكاتب السويسري ماكس فريش وأنا هنا أستعير اسم المسرحيتان  لأنني وجدتهم مناسبين لما نمر به في مصر من فترة طويلة ..

والحرائق في مجتمعاتنا يقوم بإشعالها دائما مجموعة من المتنطعين سواء باسم الدين أو اسم الفن حتى أصبحنا من دول العالم الثالث بل والعاشر ليس فقط على المستوى الاقتصادي ولكن على المستوى السلوكي والثقافي والمعرفي ...

 

حرق كنيسة وهدمها من قبل بعض المتنطعين باسم الدين الإسلامي ، فتنة  طائفية بسبب قميص لنصرة (حاجة مش عرفاها )  ، فيلم مسيء للإسلام لنصرة المسيحية (ولازم ناخد بالتار من اللي إضطهدونا وآذونا)  وهكذا ...

وأنا هنا أسأل كل فصيل غبي من هؤلاء ، أنت قبل ما تكون غبي  عمرك ما درسلك مدرس مسيحي أو مسلم في المدرسة ؟ الست والدتك ماكانش ليها جاره مسيحية أو مسلمة كانو حبايب وإخوات بيعملوا الجمعية مع بعض وتقبضها الأول المحتاجة أكتر ، ما شوفتهومش في العيد وهما قاعدين ينقشوا الكحك سوى ، ولا هما بيشتكوا لبعض من حال الرجالة مع شاي العصاري ..

 

أنت وهو  لما الست والدتك تعبت شوية ما جاتش الجارة المسيحية أو المسلمة طبخت لكم الغدا ،علشان لما ترجعوا من المدرسة تلاقوا لقمة ومسحت البيت وأخدت الغسيل الوسخ عندها غسلته وكوته وبعتته لحد ما حبيبتها جارتها تقوم بالسلامة ...

أنت وهو السيد الوالد ما كانش ليه أصحاب مسحيين أو مسلمين بينزل يلعب معاهم طاولة على القهوة ، ولا جاركم المسيحي أو المسلم جوز الست جارتكم المسيحية أو المسلمة ما دفعش مره فاتورة الكهربا لما المحصل جه علشان أبوك كان مسافر وعيب يخبط حد غريب على الباب ...

بذمتك أنت وهو مالعبتوش مع بعض كورة في الشارع ،ماقعدتوش جنب بعض في تخته واحده ، مادخلتوش الجيش سوى ،ماعكستوش البنات قدام السينما مع بعض ..

 

عمر ما كشف عليكم دكتور مسيحي أو مسلم ، طب سواق الأتوبيس ديانته إيه ولا بتسأل قبل ما تركب؟ 

بتكره جورج سيدهم ولا بتستتأل دم نجيب الريحاني ؟ طب رشدي أباظه مش جان بقه ؟ وتحيه كاريوكا نشطبها من التاريخ 

طب سعد زغلول ومكرم عبيد إيه ظروفهم؟ طب القمص سرجيوس والشيخ الغاياتي؟ ..

لو قعدت أعد هاتعب جدا ومش هاخلص ...

 

فيلم مسيء للإسلام  وفيها إيه ؟ الإسلام مش هايتهز عرشه بفيلم عمله حد غبي نرد عليه بفيلم ،طب ماهي دافنشي كود مسيئة للمسيحية ماثرتش ليه للسيد المسيح ولا ده مش تبعنا ؟

فيلم ملكة سبأ مش مسيء لسيدنا سليمان والوصايا العشر اللي اتصور في مصر واتعرض في سينما مترو ...

 

إيه الكراهية اللي إحنا عايشين فيها دي كلها ، وليه؟ وإيه الطبقية دي وإيه كم التخلف ده ..

قبل ما تكونوا مشعلوا الحرائق وتخلو بلدنا من دول العالم الثالث حبوا بعض (أن أحبو أعدائكم) مش أهلكم ،(ولتجدن أشد الناس مودة للذين آمنو الذين قالوا إنا نصارى) والمودة أعلى درجات الحب ..

كفاية كراهية  ..إرحمونا بقه