كتب - روماني صبري
علق الاعلامي والكاتب الصحفي ابراهيم عيسى، على هجوم المتشددين على النائبة أميرة العادلي، عضو مجلس النواب عن تنسيقية شباب الأحزاب والسياسيين، لتدخينها سيجارة خلال مباراة منتخب مصر أمام الكاميرون، في انتهاك واضح لحرمة حياتها الخاصة.
وقال عيسى خلال تقديم برنامج (حديث القاهرة) المذاع عبر فضائية " القاهرة والناس"، التيار المعادي لمصر وللشعب المصري هو تيار الاسلام السياسي.
لافتا :" هذا التيار لا يطيق مشهد نجاح منتخبنا الوطني في بطولة امم افريقيا، فمنتخبنا اصبح قوى ناعمة.
لافتا :" اصل المشهد قوي اوي ومحاولة اجهاضه صعبة جدا، فالاسلام السياسي عشان عاوز يخرجك من اللحظة العظيمة دي نشر فيديو لإمام مسجد مطروح الغاضب من خلو المسجد بالمصلين وقت مباراة للمنتخب.
وتابع :" واهتم كمان الاسلام السياسي بصورة لنائبة برلمانية فاضلة ومحترمة راحت تشجع منتخبها ونشر صورتها وهي بتشرب سيجارة في المدرج لاجهاض هذا المشهد العظيم.
موضحا :" يريد الاسلام السياسي التشويش على هذا المشهد بالطعن في المرأة المصرية ،وبالمناسبةالتدخين عادة سيئة للرجل وللمرأة.
مستطردا :" قالوا الحقوا نائبة برلمانية ماسكة سيجارة، طب وفيها ايه، جداتنا وامهاتنا (شيشوا) عادي، ما السيدة المصرية تدخن طوال التاريخ.
وشدد عيسى :" فخور جدا برد النائبة اميرة العادلي على هجوم المتشددين، حيث كتبت العادلي عبر حسابها على فيسبوك :"
طيب عشان نخلص من القصة والرسايل الكتير ايوة دي صورتي ..ومش مضايقة ولا مهتمة بالموضوع .
انا بشرب سجاير ومن سنين بطت اعدها ومش مخبيه ده اصلا..ومش هاابطل السجاير واكون انسان جديد عشان انا بحب أدخن ..عادة صحية سيئة بس بحبها ..زي اللي بيحب الأكل الدسم كده بيتخن وغلط علي الصحة بس بيحبه.
ببساطة مواطن مصري زملكاوي بيشجع كورة من الطفوله وبيحضر ماتشات فريقه ومنتخب بلده ديما في الدرجة التالته مش المقصورة ولا الدرجة الأولي..بيفرح ويعيط ويتعصب ويزعق ويطنط ويهتف ويغني و بيأكل ويشرب ويدخن سجاير عادي جدا .
ومعلوماتي إن علب السجاير مكتوب عليها لا تباع لأقل من 18سنة بغض النظر عن نوعه أو شغلنته أو ديانته.
والتدخين ضار جدا بالصحة ومانصحش حد يدخن ..غير كده. انا بدخن و بحب أدخن ..وانا حرة في عالم حر .. فا نفكنا بقي من الكلام الاهبل ده ..ونشجع منتخبنا يوم الأحد وإن شاء الله الأبطال يرجعوا بالتامنه ويفرحوا مصر كلها.
