سهير وهبه
. . أمى بتسلم عليكم وبتقولكم عايزين بصلتين ..
. . أمي بتسلم عليكم وبتقولكم دوقوا الملوخية بتاعتنا
. . أبويا بيقولكو هيفوت دلوقتي على عم صلاح علشان يزورو عمي حسين علشان عيان
. . يا بابا عم خالد جارنا ضربني ...اكيد انت عملت حاجة غلط علشان يضربك
. . هاتي يابت الطرحة ألبسها علشان هنشر الغسيل

. . اومال فين محمود ...تلاقيه نام عند صالح جارنا علشان هم كانوا بيلعبوا مع بعض..
. . مش هتاكل يا سيد ..لأ خالتي أم محمد حطتلي آكل مع ابنها مجدي وأنا بكتب الواجب أنا وهو
. . روحي يامديحة قولي لخالتك أم أحمد جارتنا عايزين ننشر بقية الغسيل عندك علشان بلكونتنا مش مكفية .
. . مترزعش الباب ياابني واطلع بالراحة عالسلم احنا بقينا العشا والناس نايمين متقلقهمش
. . ياأمي ياأمي محمد جارنا خربش أخويا وعوروا في دراعه ...معلش يابنتي هم بيتخانقوا وبيتصالحوا تاني روحي اندهيلوا علشان احطلو مكركروم .ياااااااااااااااا

. .  دي حياتنا لما كنا عايشين
. . من امتى ومحدش خبط على باب حد وطلب
طماطم أو بصل أو عيش او حتى نعناع
 . . من امتى ومحدش زار جاره المريض أو حتى من غير مرض وشرب معاه الشاي وقرب منه
. . طب كام مصيبة حصلت لما عيل اتخانق مع جاره وممكن تطير فيها رقاب
. . طب كام مرة وصينا ولادنا ميزعجوش الناس ويحترموا وجود بشر عايشين معانا
. . صحيح كانت البيوت قديمة والحياة بسيطة لكن كانت القلوب حية والإنسان غالي
. . فقدنا طعم الجيرة وفقدنا التواصل بالود والمعروف سبحان الله . كانت القلوب طاهرة
. . وجملة (أمى بتسلم عليكم) كانت عبارة جميلة  بتعبر عن جمال المحبة . .

  . وجمال روح الجيران
. واليوم لم تعد الحياة لها طعم بعد الاستغناء عن الجار والسجن بين أربع حيطان
.  تعالوا نرجع نحب جيراننا ونتعرف عليهم
.  تعالوا نعتبر ولاد جيراننا زي ولادنا ونصبر على بعض
.  تعالوا نفوت على بعض في الاعياد والمناسبات ولو نسلم من عالباب ونقول كل سنة وانتو طيبين
.  تعالوا لو جارنا مريض نزوره ونطمن عليه وندعيله
. . تعالوا نحترم بعض ونراعي مشاعر بعضنا ونحب للجار زى مانحب لنفسنا

. . تعالوا نبطل أذى لبعضنا بالازعاج والصوت العالي وإلقاء القمامة ورزع الباب ولعب الاطفال في اوقات غير مناسبة
. . تعالوا نضحك في وش بعض مع مراعاة الاحترام والحشمة والعفة
. . يا ريت نرجع تاني يبقى لينا كبير نرجع ليه و يحكم بينا في المشاكل
. . تعالوا نعيش تاني زي زمان
قول للزمان . إرجع يا زمان