قالت الفنانة شريفة ماهر، إنها تملك الجنسية السويدية لكن تفضل الإقامة في مصر دائمًا: «مش بطيق أقعد هناك شهر"، متطرقة إلى مشكلاتها مع أبنائها خلال الفترة الأخيرة.
وأضافت خلال حوارها مع الإعلامية بسمة وهبة مقدمة برنامج «90 دقيقة» على قناة «المحور»: «وزعت جزءا كبيرا من ميراثى، شريف وطارق شتمونى، شريف زقنى مرتين ودراعى اتكسر من 4 سنين، ولادى أخدوا كل اللي حيلتى».
وعن ابنتها ناهد، قالت: «مش حنينة، وقلبها جامد علىّ، أجمد من إخواتها، دى ما سألتش علىّ، وشريف طول عمره بيحب الفلوس أكتر من أبوه وأمه، بيعبد القرش».
وأشارت إلى أنها اعتزلت الفن وارتدت الحجاب منذ 45 عاما، وأطلقت عددا من المشروعات العقارية، وعن ذكرياتها الفنية قالت: «فى فيلم أعز الحبايب شكرى سرحان ضربنى بالقلم وعينى جابت دم، وما بقتش أشوف كويس، ودلوقتى شريف ابنى استغل الحكاية دى، ومضانى على 4 عقود لأملاكى ما أعرفش فيهم إيه».
وتابعت: «مش هشتكيه، ربنا هيجيب لى حقى، أبوه قبل ما يموت قال لى هأمّنك عشان شريف لما أموت هياخد منك كل حاجة، وفعلا طول عمره بيعبد الفلوس، وما كنتش أتخيل إنه يعمل فىّ كده، ده بقاله 9 شهور ما قاليش انتى فين».
واختتمت بأسى: "ده طردنى من شقتى الإيجار، ودلوقتى قاعدة فى عمارة كاتباها باسم بنتى نيفين، وحد قال لى إن شريف طلب الفيلا من الشهر العقارى رغم إن نيفين مسجلاها، وفعلا استولى عليها وخان الأمانة».
وبكت الفنانة شريفة ماهر على الهواء، بعدما تدخل ابنها فى الحوار على خلفية اتهامها له بضربها وسبها والاستيلاء على أملاكها مستغلا قلة حيلتها وضعف نظرها.
وقالت الفنانة المعتزلة شريفة ماهر، خلال حوارها مع الإعلامية بسمة وهبة مقدمة برنامج «90 دقيقة» على قناة «المحور»: «الله لا يكسبك يا بعيد، ورينا الأوراق مش الكلام، أنا مش مضيت لك على حاجة، انت اللى مضيتنى، انت سلطت البواب علىّ، وقلت له ما يجيبليش حاجة ويقول للناس إن عندى زهايمر، حسبي الله ونعم الوكيل فيك، ربنا ينتقم منك».
ورد نجلها: «عارف إن الجنة تحت أقدام الأمهات، مش ممكن أشتمها، وإيدى تتقطع قبل ما أمدها، لكنى اشتريت الشقق اللى عليها المشكلة، وعامل صحة توقيع منذ 2007، والمهندس اللى بنى العمارة معها شهد على هذه العقود»، لترد والدته الفنانة المعتزلة: «مزورة وهسجنك»، وعقب الابن: «بتقول بايعة لبنتها منذ 2011، إزاى هغيّر عقد البيع اللى هى عاملاه؟ اديتها فوق المليون جنيه وفوق الـ100 ألف جنيه سمسرة فى الفيلا اللى باعتها».
وأكد شريف أن أمه حررت محضرا ضده، واتهمته بضربها وسبها وكسر الشقة، دون وجود أى إصابات، وهو ما يتضارب مع روايتها الآن التى تقول فيها إنه تسبب فى كسر ذراعها منذ 4 سنوات، موضحًا أن النيابة حفظت المحضر. واختتم: «باعت شقتى لحد تانى، وما رضيتش أعمل محضر فيها، ولحد الشهر اللى فات باعت لها لحمة وفراخ وأرز ومكرونة، وببعت لها مؤن تكفيها شهر كامل»، لترد الأم: «رميت كل اللى انت بعته».
