بقلم : وفاء حمودة

في جلستي المريحة علي الكنبة وعلي حجري ابني حبيبي اللاب توب  بينما احتسي النسكافية و نتيجة الارهاق والتفكير “غفوت” ورأيت فيما يري النائم

تم إلغاء مظاهرات 24 ، 25 بناء علي قرارات مورسي لأنه

طالب جماعة الإخوان بتوفيق اوضاعها وبيان مصادر التمويل………..لما رفضوا ولآنه عضو قديم فيهم حل الجماعة بناء علي رغبة الشعب ………..و استولي علي المقارات واتحولت لمقارات مؤقته لايواء اطفال الشوراع والمشردين لحد ما تتعمل خطة قومية للنهوض بيهم

تم الاستيلاء علي جميع مصادر تمويل الجماعة ووضعها في البنك المركزي عشان الصرف علي مشروعات النهوض بمصر

تحويل كل كتب سيد قطب ……..وكل ما أثر في فكر الجماعة إلي لجنة من علماء الأزهر ……. للرد عليها.

تم التأكيد علي أن أي عضو سابق في الجماعة هيحاول ممارسة العنف  أو تحريك مليشيات الجماعة أو خرق القانون هيتم سجنه فورا بموجب قانون “لا للعنف لا للإرهاب”

جميع مشايخ فضائيات الفتة تحت الإقامة الجبرية في منازلهم ………..اما الفضائيات اللي بتنشر فكر ارهابي وبتحض علي الكراهية تم غلقها بموجب نفس القانون “لا للعنف لا للإرهاب”

تم حل تأسيسية الدستور والاستعانة بافضل الفقهاء الدستوريين المصريين والفلاسفة والمفكرين والفنانين ….الخ الخ … لكتابة دستور عصري مستمد من الإعلان العالمي لحقوق الإنسان، مع الاستعانة بتعاليم جميع الأديان السمحة التي تنص علي مساواة البشر وان الدين للديان …………. وان مصر للمصريين من كل اصل واي دين، …. وان تاريخ مصر فخر لينا والتراث المصري والآثار المصرية لا يجوز المساس بها لأنها تراث ملك الإنسانية

تم الاستعانة بافضل خبراء الاقتصاد علي مستوي مصر والعالم لوضع خطة للنهوض بمصر اقتصاديا … كمان تم الاستعانة بافضل العلماء للنهوض بالبحث العلمي والتعليم

حرية الصحافة والاعلام خط احمر ………… أما اللي ينشر اشاعات أو اخبار كاذبة وقعته سودة … وان عرف يكتب حرف تاني … أكيد مش هيكون في مصر

رجال الدين في الأزهر والكنيسة علي العين وعلي الراس …. بنروح لهم وقت ما نعوزهم وعمرنا ما نستغني عنهم…….. حتى الأزهر فتح باب الدراسة فيه لغير المسلمين …….كمان الدراسات اللهوتية مفتوحة لغير المسيحيين …………. في الأساس حرية البحث والدراسة في جميع المجالات مفتوحة للجميع والفكر لا يرد عليه غير بالفكر

صدر قانون من سيدة مصر الأولي واقره السيد الرئيس في دقايق ….. بأن التحرش ببنات وسيدات مصر يعتبر خيانة عظمي لمصر………… أما الاغتصاب يعد من الجرائم اللي ضد الإنسانية.

وفجأة صحيت علي رنة الموبايل صحابتي بتقول لي أنت فين يلا بسرعة نتجمع عشان ننزل،  قمت من مكاني واكتشفت أن فنجان النسكافية لسة سخن …….. شكيت فيه رميته وعملت واحد تاني … أكيد كان فيه حاجة غير طبيعية والا ماكنتش شفت كل ده……….. لبست لبسي بسرعة …….لبست بادي تحت لبسي الواسع تحسبا للسحل والتعرية………. حطيت موبايلي وكاميرتي والبطاقة والفلوس في جيبي تحسبا للسرقة…. ونزلت…. قابلت اصحابي  ونزلنا نهتف

يسقط يسقط حكم المرشد