كشف المخرج عمرو سلامة عن إصابته ببعض الأعراض الجانبية بعد حصوله على الجرعة الأولى من لقاح أسترازينيكا المضاد لفيروس كورونا المستجد، بخمسة أيام.
قال «سلامة» خلال منشور عبر حسابه الرسمي بموقع التواصل الاجتماعي فيس بوك: «بعد التطعيم بعقار أسترازينيكا بخمسة أيام، حرارة، رعشة، صداع، إرهاق عام، كل ده بشكل شديد جدا لحوالي ٣ أيام، بعدها بقيت كويس باستثناء شوية دوخة وإرهاق وضيق تنفس بس بشكل أبسط».
أوضح: «كل ده علامات إيجابية بتقول إن الجسم مناعته بتحارب وبتتعلم تقاوم الفيروس الحمد لله، في المجمل لو ده ثمن إن الواحد يكون في أمان بشكل كبير وإنه يساعد في القضاء على الكابوس بشكل أسرع فأنا شايف إنه ثمن مش غالي خالص».
أضاف: «مع العلم إن كل اللي اعرفهم واتطعموا يا إما جالهم أعراض مشابهة أو أعراض أقل وفي ماجلهمش أعراض خالص خصوصا كبار السن، برشح لكل الناس تدخل على موقع وزارة الصحة وتسجل، أنا عملت كده واستنيت دوري لحد ما جه، دون واسطة أو تسريع، اخترت بس مكان تطعيم عليه ضغط أقل، والموضوع ماخدش أكثر من ساعة مستني دوري وأول ما دخلت ربع ساعة ومشيت».
ووجه التحية للأطقم الطبية قائلًا: «تحية لكل الدكاترة والأطقم الطبية اللي على الجبهة في الحرب اللعينة ديه»، واختتم: «روح إتطعم، هتحس بأمان وتقلل عدد الناس اللي ممكن تعديهم من غير ما تحس، لحد دلوقتي في ناس بتموت كل يوم.. بالتوفيق».
وكان عمرو سلامة قد كشف منذ أيام عن تلقيه للجرعة الأولى من لقاح فيروس كورونا المستجد.
