مرقس كمال
أيوه لازم يا صاحبى ومتستغربش عارف ازاى ؟؟ احكيلك
زمان الناس كانوا بيحبوا يتجمعوا حوالين المسيح يسمعوا كلامه المريح واللى مليان حُب وحنية وإنسانية وكانوا بينالوا كمان بركات شفاء وفى مرة وهو بيكلمهمم قالهم محدش يدين حد او يحكم عليه وقالهم كده 👇
ولماذا تنظر القذى الذي في عين اخيك واما الخشبة التي في عينك فلا تفطن لها؟ 4 ام كيف تقول لاخيك: دعني اخرج القذى من عينك وها الخشبة في عينك. 5 يا مرائي اخرج اولا الخشبة من عينك وحينئذ تبصر جيدا ان تخرج القذى من عين اخيك! ( مت 7 : 3-5)
وكلنا عارفين ان الكلام ده معناه شوف ضعفك وخطاياك وماتتكلمش عن ضعف غيرك لكن الحقيقية اللى لفت انتباهى المرة دى ان المسيح مكانش رافض اني اشيل القذى من عين اخويا إنما رافض اني اشيلها وانا فى عيني خشبة
طب يعني ايه؟؟؟؟ يعنى لو انا رايح اتكلم مع حد على ضعفه وخطيته وانا مش شايف خطيتى هيبقى الكلام مليان لوم وعتاب وانتهار وفضح وادانة لأنى هفهِّمه انه ازاى يعمل كده وان دى حاجة تكسف
إنما لما اشيل الخشبة من عينى يعنى اعرف ضعفى وسقطتى وأصرخ للمسيح وأقوله مش قادر عليها شددنى وقومنى وأغفرلى وأقدم توبة حقيقية فى الوقت ده لازم هيحصل غفران واللى جرب التوبة والصراخ لربنا اكيد جرب طعم طبطبة ربنا وقبوله وجرب الغفران وفرحته اللى متتوصفش
في الوقت ده هقدر لما اشوف ضعف اخويا اتحنن عليه واساعده عشان يقوم هو كمان ويتشدد وهكون انا مثال حى قدامه وعمرى ما هقدر ادينه
يعنى هستره مش هفضحه
هساعده مش هنتهره
هشدده مش هأنبه
هرأف بحاله مش هقسى عليه
هقدم له الأمل والرجاء مش هفتح له باب لليأس وصغر النفس
فى النهايه هلاقينى فعلا بشيل القذى من عين أخويا بمعونه المسيح وعمل الروح القدس وده الدور اللى بيقوم بيه الخادم التائب الأمين اللى بيعمل ده دايماً بحب وإصرار اللى اتغرق حب وغفران وعاوز الناس كلها تتمتع بسكيب الحب زيه فيقول للكل ذوقوا وانظروا ما أطيب الرب
يا حبيبي الغالى .. المسيح مش عاوزك تتغاضى عن القذى اللى فى عين أخوك بالعكس هو عاوزك تساعده يشيلها إنما بعد ما تسمح للمسيح يشيل الخشبة اللى فى عينك الأول وقتها هتشوف كويس ( تُبصر جيداً) وهتساعده بحب.
يعنى الخلاصة يا صاحبى لازم تشيل القذى اللى فى عين أخوك بس بحب وستر وفرح وحنية
فهمت بقى تشيلها امتى وإزاى؟؟ ربنا يفرح قلبك ياصاحبى
#شخابيط_انسان
