محمود عثمان
لا اتوقع ضرب السد قريبا ً - وربي اعلي واعلم - علشان قانوناً اتصور انه لا يمكن ضرب حد علي احتمال فعل وليس علي الفعل نفسه... لو ضربناه دلوقتي يبقي احنا بنضرب السد بناء علي سيناريو محتمل انهم يملوا السد في يوليو القادم بكميات ضخمه مخلة توثر علي كمية المياه اللي حاتوصل لمصر لو - ودي فرضية او احتمال اخر - موسم الامطار علي هضبة الحبشة يكون متوسط او اقل ..
انا قاصد اكتب كده علشان جالي احساس ان اغلب المصريين متصورين اننا حانضرب السد في الايام القليلة القادمة والخوف انه لو لم يتم حدوث هذا يصابوا بالاحباط...
نقول تاني ، في القانون ما ينفعش تعاقب حد علشان انت حاسس ان نيته وحشه واحتمال يعمل حاجة غلط .....الكلام والتصريحات المستفزة فقط لا يعتد به كثيرا في قانون العقوبات او علي اقل تقدير لا يبرر رد فعل عنيف مدمر.. ...العقاب القاصي دائما يكون علي الفعل واسع الضرر بعد حدوثه ...لازم كمان نبقي مصحصحين لكل خطوة خصوصا لما يبقي المجتمع الدولي بيتلكك علي الايقاع بمصر في دوامة تعطل التقدم وجرنا لاستنزاف مواردنا بعيداً عن التنمية...
المشكلة بقي انه لو تم فعلا حجز كميات ضخمه من المياه وراء السد - في يوليو واغسطس القادمين - بصورة اثرت علي كمية المياه اللي بتوصل لمصر يبقي من حقك قانونا - طبقا للقانون الدولي الخاص بالانهار العابره للحدود -ضربه علشان الفعل المضر قد وقع يقيناً.. طيب ليه بتقول مشكلة ؟ علشان ساعتها لما نضرب السد اجزاء غير قليلة من السودان تغرق .....بس قانوناً انت ساعتها من حقك تضرب ..
السيسي عُقر وفاهم بدليل انه ما ضربش السد في اخر ايام ترامب لما الرئيس الامريكي قال انه متفهم منطق ضرب السد بمعرفه مصر... زي بالظبط ما سفيرة امريكا في العراق قالت لصدام حسين ان امريكا متفهمه قيام العراق بعمليه عسكرية ضد الكويت والباقي انتم عارفينه
اتصور ان الحل في الاخر حايبقي سياسي بتوصيل مياه النيل لاسرائيل .......يعني اسرائيل تقولك حاخلي اثيوبيا تلتزم ب٧ سنوات لملأ السد بدل ٣ لضمان عدم نقص المياه لمصر في اي سنه.. مَش كده وبس .. بدل ال٥٥ مليار متر مكعب حانخلي مصر يصل ليها ٧٥ مليار متر مكعب .. خدوا يا عّم ٧٠ وفوتوا ٥ مليار لاسرائيل من خلال ترعة السلام في سيناء ..اسرائيل مساحتها اقل من ٥٪ من مساحة مصر وتعددها كلها ٩ مليون نسمه ( ٧٥٪ يهود والباقي عرب ) يعني ٥ ولا ٦ مليار متر مكعب يكفّوا وزيادة ..
احتمال يكون التعنت الاثيوبي اللي احنا شايفينه ده قائم لاخراج السيناريو اللي انا قلته فوق ده بصورة تخلي الشعوب كلها تقبله حين اعلانه...اثيوبيا حاتقبله علشان غير كده اسرائيل واختها الكبيرة امريكا حايدوهم بالجزمه لو قالوا لاء وكمان حايقولوا لاثيوبيا - ترغيباً- نضمن ان السد مَش حايتضرب أبداً..
مصر السيناريو ده حايكون مقبول عمليا علشان احنا كده لا حانخش في حرب ولا حانتجرجر لعقوبات محتملة من مجلس الامن سيئ النيه .. المياه ومخصصاتها لمصر حاتزيد .. وكمان ساعتها حايتقال وماله ان يبقي شريان المياه الرئيسي لاسرائيل يكون جي من خلال مصر .. كده يبقي احنا مسكينهم من زورهم برده... كده كمان ينتهي التهديد الاثيوبي لمصر فيما يخص المياه لسنين طويلة وبدل التهديد بشُح مائي يحدث العكس .. بمعني مخصصات المياه لمصر زي ما قلنا حاتزيد ...
اللي بقوله ده قراءات وتحليل وتوقع لسيناريوهات محتمله ...وليس بالضرورة رايي الشخصي
او ما اتمناه ...
البوست ده كمان يقرأ بالعقل وليس بالعاطفه ... السيسي بيقود مصر في حقل فيه الغام مغروسة ما يعلم بيها الا ربنا... يعني غلطة بسيطة في الحساب ممكن تقلب بكارثة ......بس هو واجهزته ادها وادود باذن الله
تحيا مصر
