سهير وهبه
معنى اسمه حمل أو ثقل
كان من بلدة تقوع
وكان فقير وعمل راعي للغنم وجاني للجميز ودعاه الله للنبوة في رسالة ثقيلة لتوبيخ الشعب والملك
(تعالوا نتعلم من عاموس النبي)
1- عاموس المتضع
في الوقت الحالي لما يكون واحد فقير ويغتني كثير ينسى أصله وربما يزيف الحقائق ويدعي انه كان في الأصل غني
لكن عاموس لما وقف قدام أمصيا الملك قال: في الأصحاح السابع 14
لست أنا نبيا ولا أنا ابن نبي بل انا راع وجاني جميز
بلاشك أن شرف النبوة أعظم من كل غنى العالم لكن عاموس لم ينسى أصله انه إنسان فقير دعاه الله للخدمة ولم يتاخر
2- عاموس وقبول الدعوة
الله يدعو فقط اللي قلبه مستعد للخدمة
عاموس كان كل حياته رعي الغنم وجني الجميز عمل مرهق طول اليوم يلف بالغنم ويجني الجميز الساقط ليأكله
كان ممكن يعاتب ربنا على حياته الصعبة وفقره واعوازه
لكنه كان مثل التلاميذ اللي تبعوا المخلص بمجرد كلمة "اتبعني"
لم يهتم انه غير دارس زي الانبياء ولا فيلسوف زي العلماء
لأنه واثق ان الله يعطيه الحكمة والكلام على لسانه
3- عاموس الأمين
تخيل لو شخص بلغك برسالة توصلها لشخص عايش في قصر وأملاكه لا تعد ولا تحصى انك توصل له رسالة ان كل املاكك هتضيع وانت هتهلك
هيكون ايه رد فعله؟
ده نفس موقف عاموس النبي في رسالته
كانت رسالة عاموس هي خراب إسرائيل في الوقت اللي كانوا عايشين في حياة المجد والغنى
حتى انه وقف ضد المتعبدين عبادة شكلية والتشديد على تقديم الذبائح والعشور برضا ومحبة مش لمجد الناس
علشان كده نلاقيه يقول " واحضروا كل صباح ذبائحكم وكل ثلاثة أيام عشوركم"
الشكل العام عبادة لكنها عبادة شكلية بدون علاقة مع ربنا
(تعالوا نطبق اللي اتعلمناه)
1- مهما وصلت لمكانة أعلى لا تنسى أصلك ولا تنسى اللي وقف معاك وساعدك للصعود
2- لو ربنا دعاك للخدمة لا ترفض الخدمة لأن الله يعمل في الضعيف
ولا تقول انا غير دارس لأن الله اختار جهلاء العالم ليخزي بهم الحكاء
3- اجعل مبدأ حياتك هو الأمانة في كل عمل تعمله
حتى لو كان صغير أو قليل
افتكر ان الأمين في القليل أمين في الكثير
والكتاب قال: كن أمينا إلى الموت فسأعطيك إكليل الحياة
صباح الخير على الجميع 🌹❤
