كتب - نعيم يوسف
قال الإعلامي أسامة كمال: "بنستغرب أوي من نجوم وممثلين وسياسيين ومغنيين شايفين نفسهم أساطير مالهاش زي.. صح؟ الحقيقة المشكلة في الناس دي انها مش قادرة تعبر عن شئ موجود جوة أغلب الناس اتكلم عنه الروائي الشهير باولو كويلهو، لما سأل ما الذي تعنيه عبارة الاسطورة الشخصية؟".
وأضاف "كمال"، في برنامجه "90 دقيقة"، المذاع على قناة المحور الفضائية: "باولو كويلهو، شرحها بانها ما تمنيت باستمرار ان تفعله. كل واحد فينا بيعرف في مطلع شبابه ايه هي اسطورته الشخصية. في المرحلة دي من الحياة بيكون كل شيء واضح وممكن وما بنخافش نحلم بكل اللي نحب نعمله ف الحياة لكن فيه قوة غامضة بتحاول مع مرور الوقت أنها تثبت أنه مستحيل نحقق".
وتابع: "فكر كدة شوية وارجع بالذاكرة لو كنت كبير شوية أو ركز على أفكارك لو لسة شباب، سن، مش قلب، وشوف اسطورتك العظيمة اللي كنت عايز تبهر بيها العالم أو على الأقل تبهر بيها بنت الجيران.. كان حقك تحلم وتفكر وتقرر.. مش الظروف اللي حواليك بس هي اللي نزلتك من فوق سحاب الأحلام لأرض الواقع، لكن القوة الغامضة اللي جواك هي كمان سحبتك لتحت".
وأوضح: "لو كنت خلاص تخليت عن اسطورتك الشخصية عشان الظروف والشغل والعيال والمدام وكدة، ارجع افتكرها وحاول ترجعها ولو جزئياً.. مش لازم ترجع تبقى الناصر صلاح الدين ولا بيبو ولا حتى عماد حمدي، بس ممكن تبقى نموذج أصغر من أي واحد في دول يشعل جواك رغبة الحياة والتقدم".
