كتب – محرر الاقباط متحدون ر.ص
أبدى المخرج السينمائي يسري نصر الله، حزنه الشديد لوفاة الكاتب والسيناريست الكبير وحيد حامد اليوم السبت.
وكتب نصر الله عبر حسابه على "فيسبوك"، مفيش كلام يقدر يعبر عن إحساسي بخسارة وحيد حامد، حزن؟ أكيد. بس هي حاجة بتتجاوز الإحساس بالحزن. زي فقدان بوصلة أو فقدان توازن، واحد كان بيديني إحساس بالقوة لما يكتب فيلم أو مسلسل ويتعمل وألاقي فيه كل إللي بيوجعني ويوجع ناس كتيرة، وألاقي الموهبة المهولة إللي بيحكي بيها الحاجات دي ويبقى مبهج، وذكي، ولامع، ودمه خفيف. حاسس بالدنيا وحاسس بالناس.
وتابع :" واحد وفي لأصدقائه، ووفي لكل الناس إللي حبت أعماله ومواقفه واحد دخل في وجدان الناس بموهبته وفنه، وغصب عن أي حد كان وحيد بيلاقي الطريقة إللي شغله وفنه يشوف النور، فنه وموهبته وكرمه عملوله أصحاب كتار جدا، وعملوله أعداء طبعا، كان بيعرف يسحقهم أو على الأقل يحيدهم بفروسيته.
لافتا، وحيد يمكن آخر واحد من الفنانين والمثقفين الكبار إللي موهبتهم وإحساسهم بالناس كانت أقوى من أي قمع، نوع من الفنانين إللي عاش زمن فيه الموهبة والفروسية يتعمل لهم ألف حساب. زمن كان لسة بيشوف وبيسمع. مع السلامة ومعاك كل الحب يا وحيد، يا أستاذ وحيد حامد.
