تضامنت الفنانة زينة مع صديقتها يسرا اللوزى، بعد وصفها أحد المتابعين لها عبر حسابها على إنستجرام، بأنها «أم الطارشة»، وشنت زينة هجومًا على هذا المتنمر بعد أن تنمر على طفلة لا ذنب لها بما فيها.
وأعادت زينة نشر رسالة التنمر ورد يسرا اللوزي عليه، وعلقت، عبر حسابها على «إنستجرام»: «عارفين يعنى إيه أم، يعنى حب وتضحية ومعاناة وعطاء وتعب ومسئولية وحاجات كتير مالهاش وصف، عارفين يعنى إيه طفل أو طفلة، يعنى مستقبل وحياة وعمر جاى وتفاؤل وحب، عارف يعنى إيه تعاير طفلة يعنى الشيطان نفسه يخجل إنه يعمل كدة، يعنى أنت لا شيطان ولا بنى آدم، أنت حاجة مالهاش وصف».
وتابعت زينة: «أنت مخلوق ضعيف ومريض مرض مالوش تشخيص، لأن أي مخلوق حتى الشيطان أشرف منك أنت وأمثالك مكانكم المجارى، ولو أن المجارى فيها كائنات حية أشرف منك.. الطفلة دى ميزها ربنا واختبر أمها اختبار صعب، نجحت وجاهدت وحاربت واشتغلت علشان تقف جنب بنتها اللى مايشرفهاش تعرف أمثالك، منك لله وربنا هو اللى قادر ينتقم منك يا معدوم القلب والضمير والرحمة والإنسانية».
واختتمت زينة قائلة: «الصم والبكم هم ضمائرنا لا غير، يسرا اللوزى.. أنا فخورة بك جدا، ربنا يخليلك بنتك وتشوفيها أحسن بنت في الدنيا».
علقت الفنانة يسرا اللوزي على أحد المتابعين الذين هاجموها ووصفوها بـ «أم الطرشة»، بعد حديثها عن ابنتها الصماء خلال لقائها مع الإعلامية منى الشاذلي ببرنامج «معكم» مؤخرًا.
وكتبت لأحد المتابعين عبر حسابها الشخصي على «انستجرام»: «شكرًا على ذوق حضرتك.. أنا قررت استغل كلامك اللطيف عشان أقدم شوية توعية بخصوص هذا المصطلح، أولًا، المصطلح الصحيح والمقبول هو الصم وضعاف السمع، وليس الطرش أو البكم، ثانيًا، أحب أعبر عن فخري بكوني والدة طفلة صماء لأنها علمتني حاجات كتيرة جدًا وبقيت بني آدمة أم أحسن بسببها، وأنا متأكدة إنها هتطلع إنسانة مثقفة ومتفوقة ومش هتبقى محتاجة حد عشان تحقق أحلامها».
وأردفت: «ثالثًا، البنت الصماء دي هي اللي ألهمتني إني اتكلم في البرامج وأطالب بالكشف المبكر للمواليد اللي على أساسه كل المصريين هيتعملهم كشف سمع عند الولادة، وده المفروض يساهم بشكل إيجابي في حياة عائلات كتير وهيسمح للأطفال الصم وضعاف السمع إنهم يلاقوا الدعم منذ الصغر عشان يقدروا يتعلموا كويس وما يبقوش عبء على حد، بل بالعكس هيكونوا قادرين يندمجوا في المجتمع المريض للأسف، فبالتالي الطفلة الصماء دي ليها إنجازات أثرت على شعب كامل رغم إن عمرها 6 سنين، ياريت توضحلي بقى حضرتك أنجزت إيه في حياتك؟.. شكرًا».
