نشر الدكتور طارق شوقي، وزير التربية والتعليم والتعليم الفني، محاضرة جرى تسجيلها بمناسبة افتتاح القناة التعليمية الثانية «مدرستنا 2» قبل 10 أيام، وتشرح المحاضرة التي نشرها وزير التعليم والتعليم الفني عبر حسابه الشخصي على فيس بوك، فلسفة نظام التقييم الجديد في المرحلة الثانوية وكيفية التحضير باستخدام بنك المعرفة المصري.
ليه بنحاول نغير نظام التقييم ونذاكر من بنك المعرفة؟
وقال شوقي خلال المحاضرة: «عاوزين نتكلم مع بعض شوية بدون تكليف، عشان نحاول نقول لحضراتكم ليه بنحاول نغير نظام التقييم وليه بنذاكر من بنك المعرفة، وإيه اللي موجود على المنصة وإزاي بنعمل الأسئلة الجديدة وإيه اللي هنذاكره وإيه المقرر».
وتابع وزير التربية والتعليم: «انتوا بتسمعونا بنتكلم عن الفهم والحفظ وطريقة الأسئلة الجديدة، ويمكن انتوا مش عارفين إحنا بنعمل كدا ليه، وبنتكلم كتير عن مهارات زي حل المشكلات والتفكير الناقد والإبداع، وفي الناحية التانية الناس بتتكلم عن الامتحانات والأسئلة والمقرر واللي مش مقرر، وفي نفس الوقت مشكلة عالمية العالم كله نفسه يحلها ومش عارف يتصرف فيها وهي جائحة كورونا».
وأضاف شوقي: «حل المشكلة دي إما نلاقي علاج ليها أو لقاح ضد الفيروس، واللي هيقوم بالمهمة دي العلماء المتخصصين في ده، والدولة اللي هتوصل لكده هتكسب كتير جدا، وهتمتلك قوة كبيرة بعلمائها اللي توصولوا لحل مشكلة علمية مكانتش قدامهم وهما بيدرسوا، ولكن اللي هيحل المشكلة دي فاهم كويس جدا وهيقدر يحل مشكلة هو مشافهاش قبل كدا».
نبحث عن المهارات الحقيقة للطلاب بالنظام التعليمي الجديد
وأكد وزير التعليم، أنّ «المهارات الحقيقة هي التي يبحث عنها النظام التعليمي الجديد، ومبندورش على المهارات القديمة اللي كانت مفيدة من 100 سنة، والعصر اللي إحنا فيه محتاج نتمكن من أدوات جديدة زي التكنولوجيا اللي مكانتش موجودة زمان، بس موجودة دلوقتي واتعلمناها وإحنا كبار، لكن اللي هيعيش الـ50 سنة الجايين لازم يتعلم الحاجات دي ويكون فاهم الأمور دي وميكونش حافظ، لأننا مبقيناش محتاجين نحفظ لأنه معانا تليفونات وآيباد وأجهزة كتيرة، واللي كان موجود في الأربعينات والخمسينيات مبقاش ضروري النهارده، وعشان كدا التقييم لازم يكون على فهم نواتج التعلم».
مش لازم تكون الطريقة القديمة مصدر الحصول على درجات
وأتمّ شوقي: «عاوزين لما نيجي ندرس حاجة زي جهاز المناعة في الجسم أبقى فهمت يعني إيه جهاز المناعة، وميبقاش شغلي الشاغل إيه هو السؤال اللي هييجي في الامتحان، لأني بسعى للحصول على الدرجة، وممكن أفهم جهاز المناعة لأن هي دي المهارة اللي مهتمين تكون موجودة في كل المواد وناخد درجات بالفهم، ومش لازم تكون الطريقة القديمة هي مصدر الحصول على درجات».
