السيدة تطالب الرئيس بالتدخل : انت اتكلمت عنى وعايزك تقف جنبى لحد ما اخد حقى
سيدة الكرم تطالب التضامن معه:عايزة الناس الكويسة تقف جنبى لحد ما اخد حقى
بعد سماع حكم البراءة صرخت لربنا وقلت له انت اللى شايف اللى حصلى حقى عندك
حوار : نادر شكرى
فى اول حوار للسيدة سعاد ثابت " سيدة الكرم " بعد براءة المتهمين بتعريتها تتساءل ازاى الرئيس اتكلم عنى وكل اعضاء مجلس النواب والازهر حضروا عندى فى المنيا وخدوا بخاطرى وفى الاخر يطلعوا براءة
تحدثت السيدة فى اول حوار لها مع " الاقباط متحدون " حول صدمتها بعد براءة الذئاب البشرية الثلاث متهمين فى قضية هزت الرأى العام ، السيدة ظلت تستعيد الذاكرة فى احداث مايو 2016 ، وهى تروى لحظات دخول المعتدين منزلها وتجريدها كاملا من ملابسها ثم سحلها لخارج المنزل بشارع القرية أمام مرأى ومسمع الجميع ، ثم قاموا بنهب ما بمنزلهم المكون من ثلاثة طوابق ، ثم اشعلوا النيران فيها .
قال السيدة سعاد : كيف يحكم القاضى عليهم ب 10 سنوات سجن ، ثم يعود ليعطى البراءة لهم ، وكيف تحدث الرئيس السيسى عنها وجاءت وفود متعدده من نواب وشيوخ ازهر وقيادات للمنيا لتقديم اعتذار لها ، ثم بعد كل ذلك يصدر حكم البراءة مشيرة انها تحدثت بالصدق امام النيابة وروت كل ما حدث لها ، بكل صدق وانها لا تكذب ، فكيف يخرج المتهمين وكأنى ما حدث لم يحدث .
واستمرت السيدة فى حديثه قائلا " كنت انتظر اليوم ان اخد حقى بعد بهدلتى وتعريتى ، وحرق بيتى وطردى من القرية ، وعيالى كلهم مشيوا وهاجروا بره مصر بعد اللى حصل مقدروش يقعدوا وانا قعدى وحدى مع زوجى وعمره 83 عاما ، وكنت صابرة انى اخد حقى بعد كل السنين ده وربنا يرجعلى حقى لكن مش عارفة ازاى القاضى حكم وفين العدل ، فانا فى صدمة واشعر بظلم ، وكنت منتظر رد حقى ومرة القاضى يتنحى ومرة ياخدوا براءة
بدات الام المسنة تتحدث تقول “بعد حفظ القضية حسيت بالظلم، وده ظلم انه مياخدش حق واحدة اتبهدلت بعد ما قام نظير اسحق واخوه عبد المنعم بتعريتى وجرى 8 امتار وبعدها جريت وانا عريانه وسترتنى جارتي واعطيت لى “جلابية” واحضرت سلم وهربتني من المنزل الخلفي لمنزل اسحق سمير وراء منزل عنايات وقعدت عنده وبعدين عرفوا فحرقوا موتسكل لاسحق ووكانوا عايزين ياخدونى تاني ، ولكن اسحق خبئني فى قفص “اوز”.
وتابعت ان المعتدين ضربوا زوجة ابنها قائلة “حتى مرات ابنى بهدلوها وهربت معنا ورحنا ابوقرقاص وقعدت 5 ايام مش قادرة اتلم على اعصابي ولا باكل حتى وبعد ما القضية رجعت تانى فرحت وقلت ربنا هيدينى حقى لكن اول ما سمعت خبر البراءة فضلت اعيط واصرخ لربنا واقوله انت اللى شايف وعارف وشاهد على اللى شوفته انت ترضى يارب ورفضت كل ضغوط الصلح وارضيت بحبس ابنى ظلم وقلت مش هتنازل عن حقى ولا حق ولادى ولكن انا حاسة انى لسه عريانة محدش غطانى لم سمعت بالبراءة للمتهمين .
وطالبت السيدة الجميع التضامن معها ومساندتها حتى الحصول على حقها ، وقالت " بدعو كل الناس الكويسة اللى وقفت معى تقف معى لحد ما اخد حقى ، وبشكر كل الناس الكويسة اللى واقفه معى لان انا ست غلبانه ومليش غير ربنا ، وربنا هيجبلى حقى ، وبطلب الرئيس السيسى اللى اتكلم عنى وهو اب لكل المصريين ان يقف جنبى لحد ما اخد حقى .
أسدلت محكمة جنايات المنيا، أمس، الستار على واقعة «تعرية سيدة الكرم»؛ إذ أصدرت حكما ببراءة المتهمين الثلاثة المتورطين في القضية تعرية السيدة سعاد ثابت، 70 سنة، المعروفة إعلاميا بـ«سيدة الكرم».
وشمل الحكم الذي صدر برئاسة المستشار أشرف محمد علي، وعضوية المستشارين صلاح الدين محمد، وأحمد عزت، وأمانة سر علي حسن، ومحمد هارون، كل من: نظير إسحاق، وشقيقة عبدالمنعم، ووالدهما إسحاق، بعد 12 شهرا من صدور حكم غيابي بمعاقبة المتهمين بالسجن لمدة 10 سنوات.
وتعود الواقعة إلى شهر مايو عام 2016، حيث قام متشددون بالاعتداء على اقباط قرية الكرم التابعة لمركز أبوقرقاص، وذلك إثر انتشار إشاعة بموجود علاقه بين شاب قبطي متزوج وربة منزل، والتي أسفرت عن احتراق نحو 7 منازل، وإصابة شخصين وتعرية السيدة المسنة
