كتب – محرر الاقباط متحدون ر.ص
قال الإعلامي والطبيب باسم يوسف، للمرة المليار، انا مش باعمل برنامج "البرنامج"، من برة سواء على قنوات ممولة او على اليوتيوب لاني قلت اكتر من مرة البرنامج لو اتعمل تاني يتعمل من جوه مصر. لان اسهل حاجة اني اعمل زي ما بيعمل الهربانين بره و بيسخنوا الناس و في الاخر ناس بتتحبس من تحت راسهم و يتسجنوا و هما قاعدين في التكييف مستمرين في تسخينهم بل و ناس من عائلاتهم بتتاخد للحبس و هما بيناضلوا على حساب الباقيين.
مضيفا عبر حسابه على "فيسبوك"، اللي عمالين يزايدوا و يقولك هربت، هما هربوا قبل مني بس على الاقل انا ما تاجرتش بالبرنامج بالرغم من الاغراءات المرعبة اللي اتعرضت عليا من قنوات تنتمي للجانبين. كوني اني اعمل بقى برامج دايت، طبخ، رياضة، هباب ازرق على الاقل مش باتسبب ان ناس ممكن تتحبس من تحت دماغي. و كل اللي بيزايدوا عليا دول يوم ما التمويل يقف حيقعدوا في بيوتهم عادي و يختفوا. انا عمري ما ادعيت اني مناضل او محارب.
لافتا :" انا واحد كنت باقدم برنامج سخرية سياسية في مصر موسم تحت المجلس العسكري و موسم تحت حكم الاخوان و بعدين موسم بالكامل لما الجيش مسك لغاية لما اتوقفت بدل المرة اتنين. عايز تزايد يا حبيبي، انزل يا بابا بالكلاشنكوف وورينا نفسك بدل ما انت قاعد على مؤخرتك و عايز الناس تناضل بالنيابة عنك و في الاخر ناس تانية هي اللي حتتأذي.
واختتم:" انا فاكر كويس قوي لما محمد علي المقاول طلع و ناس فضلت تزايد عليا و تقول ما تعمل زيه يا جبان . مع انه واحد قاعد في اسبانيا بيسخن الناس و مئات الناس اتحبسوا بسببه و ماطلعوش لحد دلوقتي و قنوات تركيا احتفت بيه و سخنت اكتر و اتحبس ناس اكتر و استمروا في التسخين و النضال الوهمي على حساب ناس غلابة اهاليهم بيجروا وراهم في السجون . النضال على حساب ناس تانية و انت في امان برة مافيش أسهل منه.
