مش هتعرف تنفخ فى الزبادى

ده بيفضل ينفخ في الشوربة ينفخ فى الشوربة وكله إصرار وأمل إنها تبرد عشان يعرف يشربها ويستطعمها ويستمتع بيها 

وطبعاً ده بيخليه مع كل محاولة يدوق تانى وتالت عشان يشوف نتيجة تعبه ونفخه فيها وده معناه إنه بيتلسع تانى وتالت ومرات كتير أوى مع كل محاولة تبريد منه 

وده بصراحة بيخلينا نتحير ونسأل هو إيه اللى مخليه مُجبر على كده أصلاً ما يرميها ولا يغيَّرها ولا بلاها شوربة أصلاً 

والإجابة ببساطة شديدة لأنه بيحبها أوى 

أيوه بيحبها بس مش حُب وخلاص ده إسمه حب حقيقى عارف بقى إيه هو الحب الحقيقى ده.. 

انا هقولك يا صاحبى  

الحُب الحقيقى هو اللى بيعرف يدى مش بياخد وبس

الحُب الحقيقى هو اللى بيصبر ويتأنى ويرفق ويتحنن

الحُب الحقيقى هو اللى مش بيظن سوء ولا بيحقر او يقلل من حد

الحُب الحقيقى هو اللى دايماً يوجد أعذار للى قدامه حتى ولو مش موجودة 

الحُب الحقيقى هو اللى صاحبه بييجى على نفسه عشان اللى بيحبه

الحُب الحقيقى هو اللى بيشوف احسن ما في اللى قدامه ويجمله ويشجعه

  الحُب الحقيقى هو اللى بيسند ويساعد ويشدد ويقوى بطرق عملية مش بالكلام 

الحُب الحقيقى هو اللى لو اتكلمنا عنه وقولنا كتير عمرنا ما هنوفى ولا هنعرف نعبر صح 

ودلوقتى بعد ما عرفت ايه هو الحب الحقيقي عاوز اقولك ان فيه ناس كتير فى دوايرنا زى الشوربة الملهلبة دى بنحبهم اوى ورغم اننا بنتلسع كتير بنفضل نحبهم وهنفضل نحبهم 

واحنا كمان بدون ماناخد بالنا ممكن فى اوقات نكون شوربة ملهلبة في حياة غيرنا عشان كده كل شوية بنراجع نفسنا

وعشان كده يا صاحبى لو فى حياتك حد بيحبك كده امسك فيه وقدر حبه وهدى من شوربتك شوية لانه ياما اتحرق واتلسع منك كتير ومش بيقول عشان ميخسركش وحاول كمان تفهمه انك مقدر حبه مش تقابل حبه بعنف وشده وعدم تقدير واهانه.. اعمل كده قبل ما طاقته تخلص ويصعب عليه نفسه ويحس انه قليل وبيهابر على الفاضى ويقفل ويقول مش قادر 

من فضلك إلحقه لأنه لو قفل مش هتعرف ترجعه بسهوله. 

ولو انت من اللى بيحبوا بجد الحب الحقيقي ده اتشدد واصبر واتقوي واعرف ان طاقة حبك دى نعمة من عند ربنا وحتى لو اللى حواليك مفاهيمهم مختلفة ممكن تيأسك وتحبطك وتوصل لك ان مفيش فايدة 

من فضلك صدق انك نقى وصادق وانك بتعمل الصح وصدق كمان ان ربنا فرحان بيك وشايف عملك ومقدره لأنك بقيت تشبهه

وإفضل حب وحب ومتبطليش وقدم حبك بثقة ورجاء انه هييجي يوم تحصد حب مقابل الحب اللى بتزرعه 

ولازم تعرف برضو ان فيه حواليك كتير من اللى بتقدم لهم حب مقدرين حبك وفخورين بيك وبيشكروك دايماً على ده وبيشكروا ربنا على وجودك فى حياتهم 

الخُلاصة ياصاحبى إفضل انفخ وانفخ وانفخ بكل طاقتك فى كل شوربة بتحبها لأن طول ما حبك صادق ونقى ومتحمل ومن غير شروط عمرك ما هتعرف تنفخ فى الزبادى