محمد أبوقمر
علمت أن رئيس إحدي الجامعات المصرية قال إنه لن يقبل أن ترتدي أي طالبة زيا يخدش الحياء ، لو أن ذلك حدث فعلا فكان من الواجب علي هذا الأستاذ أن يحدد لنا شكل الزي الذي لا يخدش حياءه ...جلابية ، إسدال ، شوال ، زكيبة ، ثم إن الرجل إللي بيتخدش حياءه من أزياء معينة لابد وأنه يذوب حياء من صوت البنت المصرية ، أو من حركاتها ، أو من شدة تألق عينيها ، فالبنت المصرية تتمتع بإثارة ربانية بغض النظر عما ترتديه ، راقب كده أي بنت مصرية ، شوف طريقة تعبيرها عن نفسها ، شوف دلالها الرباني الطبيعي ، شوف خفة روحها ، وذوقها ، وروعة خطونها ، راقب كده براءتها واللمعان إللي في عيونها ورشاقة الكلمات وهي طالعة تتمخطر من شفايفها إن ماوقعتش من طولك يبقي بحق.
الأستاذ إياه اختصر حياءه فقط من شكل الزي ، مع إن المرأة المصرية زي الوردة عطرها فواح ، وأنوثتها ممكن أن تنفذ إلي روحك حتي لو غطتها بحدبد ، المرأة ياعزيزي حلوه ، حلوه ، حلوه ، ومش عارف ليه إنت وأمثالك مش عايزين تشوفوا في الدنيا إلا القبح!!!!.
الأستاذ ده لو صحيح قال كده يبقي ما عندوش إحساس ، يبقي غشيم ، تبقي جوارحه ما بتتحركش إلا لما يشوف اللحمه ، مش عارف ليه الناس دي دايما حاسه بالجوع ، الجوع الحيواني للجنس !!! .
المرأة المصرية ياعزيزي مش حتة لحمة من الفخده ، المرأة عموما ياسيد هي أبدع مخلوق في هذا الكون ، هي الحب والألفة والود والبراءة والعطف والحنية، هي أمانك واستقرار روحك ، هي علاجك من اضطراباتك ، المرأة عموما ياسيد هي أجمل حلم تتمني تشوفه وإنت نايم أو حتي وانت صاحي.
أزياء إيه إللي تخدش الحياء؟!! ، الحياء بتاعك ده إللي مدلدل من مناخيرك زي البربور حطه في منديل وارميه في أقرب سلة زبالة تقابلك ، سيب البنت ، سيب المرأة إللي صنعها ربنا من مجمل عناصر الجمال في الكون سيبها تزهزه زي الوردة وتملا الدنيا بالجمال والفرح وعالج نفسك من هذا الاضطراب الجنسي إنت وجميع المرضي إللي مشغولين بس باللحمة.
