ماجده سيدهم
من ساعات بس والدنيا مقلوبة ومافيش حديث ولا خبر ولا هاشتاج ولا إشادة إلا عن الست المصرية (ست الستات )اللي دافعت ودفعت اجرة القطار لمجند تعرض للتجريح من سائق وكمسري القطار اللي طالبوا نزوله لانه لايملك ثمن التذكرة
بل وصل الأمر بالمطالبة بتكريمها في تصرف تلقائي إنساني المفروض أنه طبيعي جدا (المصيبة أن ماحد أخد الموقف المحترم دا غيرها بس. .. )
انتو فاهمين ومقدرين حجم المصيبة اللي وصلنا ليها ..انتو مدركين يعني ايه السلوك الإنساني العادي دا أصبح ظاهرة ملفتة للنظر وعليها ضجة اعلامية تقلب المجتمع كله في لحظة .
ان كنتوا للدرجة دي مندهشين ومبسوطين أوي ..يبقى لازم تصدقوا أننا موحولين في درمغة من السواد والبلطجة والكراهية والبلادة ..
..
لازم نسأل نفسنا ايه اللي وصلنا لكدا وأي فكر رخيص وقذر حول حياتنا لحطام بشر ولنفوس خربانة ولعقول عفنة وغل بهدل أيامنا .لحتى بقينا كتلة من الكائنات الغبية والبليدة ..بقينا مهزومين اوي من جوه
أدي نتيجة غياب الجمال والفنون. والآداب ..ادي نتيجة انتشار ودعم ثقافة الكراهية والدروشة اللي خلتنا بنكره بعض ..وبنذل ونهين ونشمت في بعض. ..وقمة الانتصار لما نمتنع عن مساعدة أو رحمة ببعض. ..بس المهم اللي شاهدوا الواقعة كلهم بيصلوا ومؤمنين أن الستات ناقصات عقل ...شوفتوا هزيمة أكتر من كدا
متألمة جدا ان نشوف اليوم اللي فيه أي واجب أو سلوك راقي نلتقطه كظاهرة فردية ونمسك فيه زي خيط رفيع من بصيص أمل ... .زمان كان كلنا هذه الظاهرة دي كلنا هذه الأخلاق ..بنفس الرقي والجمال والتحضر والتفاعل ..
عذرا سيدة القطار ..فضحتينا وعريتنا .. وشكرا أنك كشفتي مرارة الحقيقة اللي بقينا فيها ..
الستات هم أمل حرية وخلاص الوطن من مواجع التخلف وفواجع الرجعية ..
