كتب – محرر الاقباط متحدون ر.ص
تساءل المخرج عمرو سلامة قائلا :" ليه "سامية جمال" لما كانت بترقص بنشوف إن ده فن راقي ودلوقتي لو واحدة صورت نفسها ورقصت نفس الرقص بنشوفه قلة أدب وخدش للحياء؟."
وتابع عبر حسابه على "فيسبوك"، ليه كوميديا فؤاد المهندس محترمة لكن اللمبي تم إنتقاده ووصفه بالابتذال؟، ليه عدوية دلوقتي أبو الأغنية الشعبية والمهرجانات بتتحارب بالشكل ده؟، بالمناسبة، وقتها كان في ناس بيتهموا الرقص بالخلاعة برضه، وفؤاد المهندس كان بينتقد، وعدوية إتحارب بكل الأشكال.
لافتا :" زمان ماكنش أحلى ولا أرقى ولا أجمل، هو مرور الزمن بيقدس الأشياء لأنك تأقلمت معاها وأصبحت جزء من ذكرياتك بس، وكل زمن فيه ناس خنيقة مصممة تحارب كل ما هو جديد بدافع إدعاء الرقي والأخلاق وسعيا للتميز.
واختتم :" بس التاريخ لسة فاكر دلع سامية جمال وعودة مستر إكس والسح الدح إمبو ولكن التاريخ مابيفتكرش أي شخص مدعي وخنيق لإنه كل اللي قدمه للبشرية إنه حدف الناس بالطوب.
