ايمن غالي

كتير مش فاهمين أهمية دراسة التاريخ ويقولوا وإحنا مالنا بناس عاشت وماتت من مئات وآلاف السنين ؟ ندرس الحاضر وبس ..

حياتنا عبارة عن خبرات متراكمة، وقبل التاريخ (بداية عصر الكتابة) كان الإنسان بيتولد ويعيش ويموت بدون ما يقول لنا حاجة عن حياته وخبراته وحلوله لمشاكل قابلته .. علشان كده الحضارة كانت ماشية تاتا تاتا من بداية ظهور الإنسان الأول من 200 ألف سنة ولغاية ظهور الكتابة في مصر حوالي 3150 ق.م ..

ومن بعد ظهور الكتابة؛ بدأت الحضارة في الإنطلاق بسبب تسجيل الخبرات وتراكمها في صورة مكتوبة ..

إمبارح كنت بأقرا بحث عن تردي قيمة العملات في مصر في بدايات القرن الـ 15 وأسبابها .. وعزوف الناس عن العملات المحلية واللجوء للعملات الأجنبية .. (المماليك كانوا عاملين تعويم للعملة)

تحسوا إن التاريخ بيعيد نفسه وبيحكي ظروف عيشناها بداية من هوجة يناير لغاية النهاردة ..

والمثل المتخلف إللي بيقول لا يلدغ مؤمن (مش عارف إشمعني مؤمن) من جحر مرتين؛ الطبيعي إن لو واحد إتلدغ من جحر وكتب علي الجحر إنه فيه تعبان في الجحر؛ لا هو ولا غيره ممكن يتلدغ منه ..

إللي ما بيعرفش تاريخ حا يعيش تدق علي راسه الطبول ..