كتبت – أماني موسى
قالت الفنانة سوسن بدر عن عدم خوفها من السن وظهور الشعر الأبيض، أنا دلوقتي شكلي كدة، وأنا عايزة أبان زي ما أنا فعلا، ولا أقلق من الشعر الأبيض ولا خطوط التجاعيد تحت العين، بالعكس أراهم بقية التجربة الحياتية التي عشتها، والفيصل بالنهاية لأي رجل أو امرأة مهما كان سنه أن ينظر بالمرآة ويكون مبسوط ومرتاح.
وأضافت في لقاءها مع الإعلامية لميس الحديدي، ببرنامج "القاهرة الآن" المقدم عبر شاشة العربية الحدث، أول حد بنشوفه الصبح هو نفسنا، وأنا عايزة أشوف الصبح حد مبسوط وبسيط مش شخص تاني أنا معرفوش.
وعن قرارها بالظهور بالشعر الأبيض رغم كونها فنانة، بما يعد جرأة وقدرة شخصية، قالت بدر: من عشر سنين كان شكلي مختلف، وطبيعي أن شكلي بيختلف من سنة للتانية وطبيعي أن الإنسان بيكبر مش بيصغر.
مستطردة، عندما أقوم بتجسيد دور الأم المصرية لابد أن أكون فعلا كشبهها، هل الأم والست المصرية اللي عندها بنت في التلاتينات معندهاش شعر أبيض؟ مشيرة إلى انها ترى كثيرات يخشين من الشعر الأبيض وكأنه سبه، وينبهون صاحبته كما لو أن هناك شيء غير لائق.
وتحدثت عن مواقف تعرضت لها بكواليس التصوير المختلفة حيث تجد معاونيها أو القائمين على المكياج يخبرونها بأن هناك شعرة بيضاء، لمدارتها، فتقول: يا جماعة أنا بعمل دور أم، وأم عادية مصرية وفي الغالب مش بتلون شعرها.
وشددت أن الأمر كله مسألة قناعة، وأنا من زمان قررت أحافظ على شكلي من غير ما أغيره، بهتم ببشرتي بس مش مهتمة أمسح من عليها السنين، حابة أخلي شكلي في أفضل شكل المفروض يكون عليه دلوقتي مش من 30 سنة.
وتابعت، أنا مش خايفة من الزمن خالص، هي دي حياتي وهو دة عمري اللي عشته، والبعض يفضل أن يظهر بشكل مختلف وأن يداري آثار السنين، لكن أنا حابة أكون كدة وكل ما أكبر خطوط تجاعيدي هتزيد وهفرح بيها وهحس أني عشت حياة حلوة وراضية بكل اللي فيها.
وأوضحت أن عدم صبغ الشعر لا يعني إهمال النفس والجسد، فهي حريصة على الاهتمام بشكلها ولبسها وجسدها وبشرتها وصحتها، وهذا الأمر لا علاقة له بالسن، وأكدت إن من حولها يشجعونها على هذا.
وأردفت، إحنا لما بنكبر مش لازم نتبهدل، مش لازم يبقى شكلنا وحش ونهمل نفسنا، أنا شعري أبيض لكن بهتم بنفسي وشكلي، ودة اللي عايزة أوصله للناس: متخافوش.. بنكبر دة إحنا قمر، والوعي والفهم بيعطي جمال بخلاف جمال الشكل، يعطي حالة من الروقان واستمتاع بالمرحلة الجديدة في حياتنا.
ودعت لأن يكون هناك أشخاص تدعم شكل الست المصرية وعدم الخوف من العمر والتقدم بالسن، بالعكس يكون هناك أشخاص يساعدوهم على إظهار جمالهم بهذه المرحلة العمرية وعمل تسريحات جميلة وتسعدهم بالشعر الأبيض.
وعن قبول المجتمع للرجل الكبير بالسن، بينما التنمر بالمرأة الكبيرة بالعمر، قالت بدر، دي سلوكيات جديدة وغريبة على المجتمع المصري والشخصية المصرية، وهنا دور التوعية بأن التقدم بالعمر أمر واقع، أنا هكبر وأنت هتكبر ووالدتك ووالدك هيكبروا وهكذا.. علينا أن نغير النظرة ومع الوقت سيصبح الشعر الأبيض وتقدم العمر أمر عادي.
