احمد سالم
مش عايز حد يزعل مني بس بصراحة وبما اني درست تصميم الازياء يوما ما ،لازم اعترف ان ناس كتير عايزين ستايلست عشان يعرفوا يلبسوا ايه امتي وازاي بعيدا عن الفقر والغني،
بدليل انهم زمان كانوا بيلبسوا قميص لينوه البيضا علي بنطلون صوف المحلة او فستان سادة تفصيل وكانوا في منتهي الشياكة ،
عزيزي الشاب صدقني البدلة اللميع السودا والفضي دي جريمة في حق المجتمع وماتنفعش في الافراح ولا في حفلات الجامعة ولا في انترفيو اي وظيفة ولا في أي مكان وممكن بنفس فلوسها او اقل تجيب بدلة كحلي جميلة تمشي في كل وقت.
موضوع الكوتشي الابيض علي البدلة السودا اللي بتلمع هو تاني جريمة لازم تعترف بها ولازم تعرف ان اللي يليق علي عمرو دياب وحماقي وتامر مش شرط يليق علي حنفي ابو دقة والعربي شخصية وزي ما جينيفر لوبيز بتغني بالمايوه مفيش بنت عندهم بتخرج كدة ،
محدش في دول العالم المتحضر بيلبس بنتاكور_ بدل الشورت _وشراب علي صندل في الصيف ومفيش حد بقي بيلبس صنادل اصلا غير اخواننا السلفيين وحتي الشراب والكوتشي علي البحر ملهمش اي معني وبيقلبوا علي دسوقي افندي في المصيف،
القميص الكتان عالمايوه موضة فعلا بس ده مش معناه انك تحط التاتش بتاعك و تلبس قميص فرحك او قميص يوسف منصور في قبضة الهلالي اللي غالبا بيكون اغلي من الكتان،
فكرة نزولك البحر بتيشيرت وبنتاكور بتخليك شبه سيد بيه قشطة ومعتقدش ان موضوع العورة هو السبب لان صرة وفخد حضرتك مش بالاثارة اللي انت متخيلها،
الخواجة عمل قصات كتيرة وسماها slim fit ,regular fit وغيرهم عشان كل واحد يلبس اللي يناسب جسمه مش عشان تحشر كرش حضرتك في تي شيرت اخوك الصغير علي بنطلون زمارة وانت مقتنع تماما انك فالانتينو الطالبية ،
لو اشتغلت في المبيعات او التسويق مش منطقي انك تجيب بدلة صوف العسكري وانت عارف انك بتمشي كل يوم ٧٥كم في ظروف مناخية استوائية في قلب القاهرة وممكن بنطلون جبردين قطن علي قميص سادة يبقوا اختيار افضل،
وبالنسبة للناس اللي مصممين علي فخفخينة البدلة الزيتي والقميص الاصفر بكرافتة عصافير الجنة او البدلة البيج والقميص البني والكرافتة العريضة اللي بتدفي الصدر ،عايز اقول لهم ان القميص الابيض تحت البدلة هو ملك الالوان وممكن نستعين باللبني لكن اختراعاتهم دي بترجعنا لزمن صضقني وسعيدة مبارك،
اما الست الفاشونستا الغالية فلازم نبدأ معاها في اولي جرائمها الانسانية اللي بتعملها في الافراح ،من اول وش الجير الابيض وكيماويات البناء الحديثة اللي بتبيت وشها فيها من قبل الفرح بأسبوعين لغاية حفلة الترتر اللي بتلبسها ،
ياست الكل مش اي حاجة بتلمع تعمليها فستان وبلاش الفيس ليفت اللي بتعمليه في الفساتين ابوس ايدك ،لو محجبة اشتري فستان بكم ولو مش محجبة اشتري فستان عادي لكن تجيبي بدلة رقص وتلبسي تحتها الزفت الكارينا ،اقسم بالله بتبقي فرجة الفرح ،ده غير ان إسبانيا نفسها سابت الكورونا ونزلت بيان رسمي بتنفي فيه علاقتها بأم الطرحة الازبانش وبتتهم الست المصرية بتدمير السياحة الإسبانية وتشويه صورة الأندلس والحجاز كمان باختراعاتها العجيبة،
في الشتا الشياكة مش لازم تبقي انك تحشري البنطلون الجينز في بووط خصوصا لو جسمك مليان من فوق ،ومايصحش ابدا تلبسي بالطو جلد او فرو الصبح وانتي رايحة انترفيو ابنك في المدرسة عشان غالبا المديرة بتقفل منك،
اللي بتعمليه في الشواطيء ممكن يتصنف من جرائم الحرب و بيخلي جوزك احلي منك حتي لو ضارب الكوتشي والشراب ،لأن مفيش حد بيحط كمية البوية دي وبيربط علي راسه منديل محمود المليجي في فيلم الارض غير حضرتك ولو محجبة روحي بلبسك العادي ولك كل الاحترام لكن الميكس فراولة ده بيخليكي شبه سعيد صالح لما لبس ست في العيال كبرت ، و كلام في سرك منظر البونيه والتيربون هايخلي جوزك يتجوز عليكي في البحر،
مش لازم تجمعي كل الوان الطيف في طقم واحد وكفاية لونين اضمن ولازم تعرفي ان ربنا ماخلقش واحدة سمرا شعرها دهبي وعينيها ملونة عشان سيادتك تتحدي الكون وتعمليها.
اصرارك وانتي محجبة علي استخدام قصة شعرك زي تندة الوقاية من الشمس لمسافة ٧ متر لقدام ده ستايل عفا عليه الزمن والطرحة اللي غرقانة في ١٥ جردل بوية بتكمل الصورة البائسة،وبعدين يا تلبسي مايوة عادي يا مايوة محجبات لكن خلطة فوزية دي بتخليكي دولفين لابس طاقية ،
اخيرا ونداء عام للجنسين ،في الحر وفي زمن العرق الجميل مفيش احلي من القطن في اللبس والبوليستر ده بره بيعملوا منه الكياس النايلون ،
ومحدش يقوللي الاسعار وكدة عشان فيه متر قماش قطن زي الفل ب٣٠جنيه وان مكانش عشان امراضكم الجلدية يبقي عشان امراضنا التنفسية .....
واحد يقوللي وانت مالك ماتسيب كل واحد يلبس علي راحته ،
انا اقول لسيادتك ،بصراحة كل ما اقعد مع حد مش مصري وعايش هنا الاقيه بيستفسر عن الاستايلست السافل اللي خارب البلد وازاي اغلب الناس معندهمش ذوق في اللبس في زمن التقييم الوظيفي بيوصل فيه لدرجة مراقبة طريقتك في الكلام واختيارك للالوان ونضافتك الشخصية ،
يعني الكلام الفارغ ده من وجهة نظرك بيفرق جدا في تعيينك في الوظائف وعملك في السياحة والتسويق والمبيعات .....
