بقلم / مارى موريس
س / انا ابنى سلوكه بيتغير خالص بسبب فيديوهات العنف اللي بيشوقها على اليوتيوب مش عارفه اتحكم انى امنعه منها لانى بمنعه من التاب وكعادة اليوتيوب اول مابيدخل بيعرضها اتوماتيك من غير سيرش أتعامل معاه ازاى عشان يرجع تانى لسلوكة الكويس؟؟؟!!!
ج/ محتاجين نثبت مع طفلنا شوية قواعد واتفاقات بالبلدي كده نعمل (عقد ) بمنتهي الوضوح والهدوء والحب
1- حبيبي التابلت ليه ميعاد محدد لان ربنا علمنا ان كل شئ تحت السموات وقت ( الاكل ليه وقت - النوم ليه وقت - المدرسة ليها وقت - اللعب ليه وقت - كمان التاب ليه وقت )
لاننا لو عملنا اي حاجة في غير وقتها بيبقي طعمها وحش يعني مثلا لو في اكلة حلوة اوي انت بتحبها جيبتها لك وانت مش جعان هتقدر تاكل منها ؟؟ لا .. طب ولو أكلت وانت مش جعان هتحس بايه ؟؟؟ مش هتحس بطعم الاكل وفي الغالب بطنك هتوجعك وهتتعب .....
"لكل شئ تحت السموات ليه وقت"
2- انا بخاف عليك وبحبك جدا انت اغلي حاجة عندي
هنتفق انه في حاجات هينفع نشوفها وحاجات مش هتنفع تشوفها ...
دلوقتي يا حبيبي لو في مثلا ازازة كلور في المطبخ ينفع تيجي تقولي ياماما انا عايز ادوق الكلور ده بيبقبي طعمه ايه ؟؟؟ .....
طب ولو انت طلبته تفتكر انا ممكن اديهولك ؟؟؟ ليه ؟؟؟
عشان انا بحبك جدا وعارفة اني لو سمعت كلامك واديتك تدوق الكلور ده هتتعب جدا جدا وتعيا ... وانا مش هقدر اشوفك بتأذي نفسك ....
👈(كوني بتتفرجي معاه _ مش تسيبيه هو عايش في عالم لوحده _ التاب والموبايل والفيديو وكل ده علميا مش المفروض يكون اكتر من ساعة في اليوم تقسموها زي مانتوا عايزين ..
- قبل مايخلص وقت الموبايل ب 10 دقايق ابداي فكريه حبيبي فاضل 10 دقايق والوقت يخلص ونشيل الموبايل .... 5 دقايق تاني وفكريه فاضل 5 دقاييق .... خلصو الووقت بتروحي بكل هدوء وابتسامة وحضن لحد عنده وتاخدي الموبايل ( بتعملي فعل ) يعني مش كفاية تقوليله الوقت خلص ياللا سيب الموبايل بقي وتدخلي تنشغلي في حاجة تانية
اخر قاعدة هنقولها ان اللي بنتفق عليه ده لمصلحتنا كلنا وللأسف لو ماقدرناش نعمل كده ( للأسف مش هينفع اديك الموبايل تاني لاننا ملتزمناش باللي اتفقنا عليه ) وكبريه انه يلتزم باللي قلناه
# ملحوظة بقي ... لو ابنك / بنتك معاه موبايل او تاب منفصل عن بتاعك فانتوا تقدروا تتحكموا فيه من خلال ابليككيشن من بلاي ستور اسمه
family link for parents
وفي التاب بتاعه هو تنزلي
family link for children
ومن خلاله بتقدري تتحكمي في التاب بانك ممكن تقفليه
خالص ومايقدرش يفتح اي حاجة ...
اما فيديوهات اليوتيوب نفسها فحضرتك تقدري تحذفيها ومش بترجع تاني المقاطع اللي بتشيليها
( عن طريق بنعمل كليك يمين عالفيديو بيكون في اختيار اسمه غير مهتم / او احذف ) اما لو اعلان مش بنقدر نتحكم فيه ..-
اذا قررتي انه مش هقدر اديك الموبايل لو مالتزمناش حضرتك بتنفذي اللي اتفقتوا عليه بالحرف من غير زيادة ولا نقصان ( بعد التنبيه مرتين عالاقل )
مع الزن لو اتراجعتي ... ابنك هيخسر قدرته علي الالتزام بعد كده لما يكبر وحاجات تانية طبعا وحضرتك هتخسري انه ابنك عرف يجيبك منين، ..
#من أسئلة القراء
موجهة منتسوري ومتخصصة في التربية والتوعية الجنسية للأطفال والمراهقين _ دبلوم الصحة النفسية والإرشاد الأسري
