القس دانيال عايد عن خطية سوء الظن " قائمة على التخيلات الذهنية والتحليلات السلبية "

من أكثر الخطايا الشائعة التي  تمر علينا في حياتنا هي خطية  "سوء الظن " والتي طالما اعتادنا عليها ودون أن نشعر في العديد من مواقف الحياة فإنها تعتبر من أبشع الخطايا التي تتغلغل داخل النفس البشرية وتسطير عليها ، وتتعامل كالسرطان الذي يهدم الكثير من العلاقات البشرية.

 

وعند التساؤل عن هذة الخطية  فقد  نرجع إلى ما نشره القس دانيال عايد كاهن كنيسة العذراء  مريم بمحافظة قنا ، عن تلك الخطيه التي تتوغل في معظم مواقف الحياة او حتى في الخدمة بداخل الكنائس.

 

+ خطية سوء الظن خطية مش موجودة بشكل محسوس و بتكون قائمة فقط على التخيلات الذهنية والتحليلات السلبية المجتزئة للأشخاص والمواقف ، و خطورتها بتكمن أنها مش معلنة في أغلب الأحيان بتبقى عاملة زي السرطان كدة .

 

+ خطية سوء الظن خطية خبيثة لأنها بتولد خطايا أخطر منها زي الخصام - النميمة - الظلم - الإدانة - الغضب - جرح المشاعر و غيره كتييير .

 

+ غالبا سوء الظن بيجي بسبب الكبرياء و ثقة الإنسان الزايدة في صحة تفكيره وقرايته للمواقف و ده بيدعم عنده الأنا ، لأنه دايما مش بيحط نفسه مكان الشخص المدان لأنه دايما في جانب الديان .

 

+ الشخص الواقع في الخطية دي غالبا مع الوقت ( و ده ممكن يكون سنيين ) بيكون خسر ناس كتيييييييييير من محبيه وأصدقائه بس عشان ظن فيهم سوء بسبب انه سمع عنهم أو منهم كلام عنه أو حتى شاف مشهد هو مايعرفش دوافعه .

 

+ للأسف الخطية منتشرة جدا في المجتمع الكنسي وخاصة الخدمي و ده بيخلي دايما الخدمة فيها غليان مستتر و بيضعفها على المدى البعيد .

 

١. " المحبة لا تظن السوء ولا تفرح بالإثم .. بل تصدق كل شئ وتفرح بكل شئ "

راجع محبتك حسب خريطة المحبة الموجودة في كورنثوس الاولي ١٣ و شوف أنت حققت قد ايه من الإصحاح ده !

 

٢. " محتملين بعضكم بعضا ومسامحين بعضكم بعضا .... كما غفر لكم المسيح هكذا انتم أيضا "

محتاجين نجاهد في الإحتمال و الغفران طول الوقت لأن ربنا كمان بيعمل معانا كدة .

 

٣. " إن أخطأ اليك أخوك إذهب وعاتبه ..تكون قد ربحت أخاك "

المصارحة تؤدي للمصالحة صارح و عاتب من أجل المحبة و الربح و ماتكتمش جواك عشان إبليس بيحب يشتغل في الضلمة و الحاجات المستخبية .

 

٤. لما تيجي تعمل علاقة مع حد إفتكر دايما إنه ليه أخطائه و إنت المفروض تقبله بعيوبه قبل مميزاته زي ما انت عاوز تكون مقبول بعيوبك ومميزاتك .

 

٥. آخر حاجة

خليك ( بسيط ) و البساطة بنت الإتضاع ، و الإتضاع بييجي من يسوع شخصيا .. هو قال خليك بسيط وحكيم ( مش خبيث ) .