كتب – نعيم يوسف
قدم الدكتور محمد علام، نائب مدير مستشفى النجيلة في مطروح، عبر حسابه على موقع التواصل الاجتماعي "فيسبوك"، 18 نصيحة للمواطنين للوقاية من فيروس كورونا المستجد.
وجاءت هذه النصائح كالتالي:
١- الفيروس مش بيتنقل عن طريق الهواء غير فى ظروف معينه داخل المستشفيات وده كلام منظمة الصحة العالمية حتى الان
لبس الكمامه حاليا اصبح مطلوب جدا فى الاماكن الزحمه والمواصلات والتجمعات وان كان البعد عنها احسن.
٢- الجوانتى ملهوش اى لزمه للمره المليون بيضر مش بيفيد.
٣- غسيل الأيدي لمده 20 ل 40 ثانيه بالمياه والصابون كفيل لقتل الفيروس.
٤- الكحول من اول تركيز 60٪ ممتاز ويقضى عليه تقدر تمسح ايدك كويس بيه كل شويه مش تغرقها.
٥- لو حاسس باعراض برد بس البس كمامه كح واعطس فى منديل ولو الاعراض مستمره ومتحسنتش روح اكشف ومتخافش هتخف
لو انت عملت كده وغيرك عمل كده مش هتنتشر العدوى بينا.
٦- اى نوع اكل مبيقضيش على الفيروس الاكل الصحى بيحسن المناعه لكن مبيقضيش عليه.
٧- الميت مببنقلش الفيروس ولا فى خوف منه طالما متغسل. ومتكفن داخل المستشفى هيطلع بدون اى خطر منه تقدر تدفنه عادى ومتخفش الخوف من التجمعات والعزاء والسلام والتقبيل والاحضان
٨- الاسواق دخولها يكون بحساب وفى اوقات مش زحمه ومتلمسش حاجه غير اللى هتشتريها وتمسح ايدك كويس قبل دخولك الاسواق وبعد خروجك
منها ولابس كمامه وبلاش جلافز
٩- الكلور مطهر ممتاز لكن مينفعش على الجلد
١٠- الملابس بتتغسل بالمياه والمسحوق فقط كفايه جدا وكفيله تقضي على الفيروسات
١١- ارتفاع درجه الحراره فى الصيف مش هيقضى على اننشار الفيرس اى نعم هيقلل عمر الفيرس على الاسطح يعنى بدل ١٢ ساعه هيقل مثلا ل ٩ وبدل ٣ ايام ممكن يكون يومين لكن مازال موجود وبينتشر بمعدل اقل شويه
١٢- مفيش علاج نهائى ليه حتى الان اللى بيحصل علاجات تجريبيه وفى منها مبين نتائج مبشره وحتى الان الناس بتخف بسبب مناعتها وادويه
لعلاج الالتهاب الرئوي اللى حصل وتعويض الضرر وناس كتيير بتعدى وبتخف الحمد لله وفى ناس للاسف بتتوفى
١٣- الاصابه بالكورونا مش عار ولا عمرها هتكون عار ده مرض زى باقى الامراض ونسبه الشفاء منه عاليه جدا
١٤- أعراض المرض مش واضحه وعلشان تبقى واضحه لازم يكون عدى فتره على الاصابه بتوصل لاسبوع علشان تبدء تظهر علامات فى
الاشعه المقطعيه والتحاليل تخلينى اشك
١٥- الحل الوحيد التباعد المجتمعى والالتزام بتعليمات النظافه والتطهير حتى الان ويا ريت لو استغلينا الموضوع ده صح لان ده بيامن كل الناس من الانفلونزا وغيرها من الفيروسات التنفسيه
١٦- كبار السن واصحاب الامراض المزمنه اللى مش مظبطين علاجاتهم اكثر عرضه للمضاعفات بس مش معنى كده ان كل واحد كبيير لو عنده مرض مزمن هيموت الوفيات من ٦ لـ ١٦ ٪ من الفئات دى فنخاف عليهم ونزولهم يكون ممنوع والخطر عليهم هيكون منك فأمن نفسك كويس
وانت خارج وانت راجع
١٧ - الخل مبيعملش حاجه مع الفيروسات التاجيه اللى كورونا المستجد واحد منهم ملهوش لزمة فى الحالات دى
١٨ - لو انت لابس كمامه فانت حميت نفسك بنسبه معينه لكن لو شخص بيكح او بيعطس هو اللى لابس كمامه هتقل الخطوره جدا فخافوا على بعض عندك اى اعراض متنزلش من غير كمامه لحد لما تطمن وانت بتكشف ابوس ايدك البس كمامة.
الجدير بالذكر أن فيروس كورونا ظهر في البداية في الصين، وانتشر منها إلى باقي دول العالم، ووصل عدد الإصابات إلى حوالي 2 مليون 745 آلاف مصاب، وتوفي بسببه أكثر من 191 ألف.
أما في مصر، أعلنت وزارة الصحة والسكان المصرية، في بيان لها أحدث الأرقام، هو 4092 حالة من ضمنهم 1075 حالة تم شفاؤها وخرجت من مستشفيات العزل، و 294 حالة وفاة.
