مرقس كمال
قالوا وباء قالوا غضب وانا قلبى شايفه افتقاد
شايف يسوع بالحُب يروى قلوب واكِلها كتير جراد
والأعمى فتّح والكسيح بكلمه قام يجرى عليه
ده بكلمه منه عشان خلاصى يمنع ويسمح إن أراد
سنين طويلة يسوع بحبه واقف يخبط ع البِبان
ومره نسمع مره نفتح وبنقسى ويطول الزمان
فجأة يِسَكِّتْ كون بحاله لأجل ما نسمع نِداه
وسط الهدوء يعلن حضوره وصوته فى قلوبنا يبان
هنقسى تانى ولا نفتح بعد اللى حاصل واللى جَد
قدام مراياتنا وقِفنا نشوف حقايقنا بجد
مهو لما نفتح راح نعاين أبدية ع الارض وسما
وقلوبنا يسكنها يسوع اللى ف جماله ما شُفنا حد
