بقلم: مرقس كمال زاخر
(رباعيات)
(1)
الحب رافع قضية قدام محاكم الدولة
عاوز حكم قضائي عشان حق المزاولة
والشكوى ناس هجروه وقالوا مصالحنا أولى
سمع القاضي وقال الحكم بعد المداولة
(2)
المستشارين اتشاوروا ووصلوا لحكم وقرار
من حقك إنك تشتغل لكن مفيش إجبار
إزاي هنحكم بالحب والحب دا اختيار
مش بالكلام نحب لكن بالاختبار
(3)
خرج الحب يدور على قلب يسكن فيه
شاف الخصام والكره مالك كتير حواليه
لكن أمله يغير وهدفه مصر عليه
خبط أهو على بابك.. هتفتح وألا إيه..؟
(4)
افتح بسرعة وقوله دوقني طعمك يا حب
كتير سمعت عنك نفسي أعرفك عن قرب
شبعني يا حب منك واملا الكيان والقلب
خليني أقدر أحب القُرب ويا الغُرب
(5)
غريب حالك يا دنيا سايد فيك الخصام
سحبانا ليه لورا زقينا بقه قدام
فرحانة أوي بالكره والحقد والانقسام
امتى ناسك يعيشوا فيك بحب وسلام
(6)
ف عيلة واحدة تلاقي إخوات وزعلانين
كانوا بيحبوا بعض وهما صغيرين
ولما كبروا اتخاصموا على إيه محناش عارفين
واحد ف حاله والتاني حاطط عليه العين
(7)
في الفرح ناس تتقابل في الوش تبتسم
جايه عشان تتقايم على بعض وتترسم
أدى الكيان الواحد بسرعة يتقسم
عشان خلافات بسيطة بالحب تتحسم
(8)
ده جاي عشان ده واجب وشئ لزوم الشكل
وده جاي عشان يعيش ف بوفيه وشرب وأكل
وقليل هو اللي جاي فرحان لفرح الأهل
الحب شح ليه وجفانا أصبح سهل
(9)
في الحزن شكل تاني صويت وصوت مخنوق
م الغمز الكره باين زاعق كصوت البوق
والدنيا دي ما تسوى إمتى بقى هنفوق
افتح عينك وركز دي الوعظة ف الصندوق
(10)
ولو سألت واحد خصامك سببه إيه..؟
يذكر لك شخص تاني ويرمي اللوم عليه
ويقعد ساعة يحكي ويقولك ع اللي ليه
وطبعًا معلهش حاجة ملاك سعادة البيه
(11)
ولو سألت قلت طب ليه مفيش عتاب
وليه مترحش عنده تدق عليه الباب
اسبق أنت وصالح زي ما قال الكتاب
يقولك طب كرامتي أشيلها في الدولاب..؟
(12)
ولما تجيله ضيقة تتعب وتتأثر
وساعتها يدق بابك ويغير المنظر
يضحك ياكل ويشرب ويمشي متأخر
وفجأة يقلب وشه وسلامه يستخسر
(13)
تشوفه تسلم عليه يرد بالعافية
تحس إن الغيوم ملت السما الصافية
وتقول ف سرك ليه المحبة مش كافية
تمشي وتسيب مشاعرك في القلب مختفية
(14)
الكره دلوقتي بقى حرفة وصناعة
اتقنها اللي واخد ضد الحب مناعة
وعنده خبره فيها ونفذها بفظاعة
حتى الجيل الجديد شربها ف الرضاعة
(15)
بنقول نحب لكن بنعشق التمثيل
وفلان ميستحقش علان ده دمه تقيل
بالذمة ده اسمه حب الحب ده سبيل
فيض مبينتهيش وما يعرف مستحيل
 (16)
ياريت نرجع نحب قبل فوات الأوان
ده الحب بذرة اتغرست ف قلبك من زمان
سقيتها ولا ماتت ولا رميتها ف مكان
اسقيها تبقى شجرة وثمرها ع الأغصان
(17)
الحب طاقة بيها بتتخطى الزمن
وتطير بعيد تلاقي ليك اسم وليك تمن
سيب نفسك لجناحاته وعلى قلبك ائتمن
سلم للروح شوية وسيبك م البدن
(18)
رسالة لكل شخص بالكره قفل القلب
ارفع إيدك لفوق اصرخ وقول يارب
اطبع صورتك ف قلبي علمني إزاي أحب
ما أنت يارب محبة من فيضك املاني حب

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :