ماجده سيدهم
الأول بس نفهم أن فيرس كورونا دا أقسم بكل أيمانات الله أنه مش مؤامرة صهيونية أمريكية ماسونيه كونية ولا هو مخطط فضائي ولا هو اضطهاد للقضاء على الاديان خالص ..
دا بعيد عنكوا زي مانتوا شايفين كدا موت جماعي في الشوارع .. والعالم على وشك يبقى مقبرة مفتوحة ..واحنا والحمد لله لا وعي ولا إمكانيات ولا عاوزين حتى نفهم ..
رغم أن كل التفاصيل عن الڤيرس معروفة بوضوح للجميع ..
أولا ..القرار بغلق الكنائس والجوامع في الوقت الحالي والصعب جدا .. وبصرف النظر انه قرار الدولة في المقام الأول واستجابت له المؤسسات الدينية بكل شرف وشجاعة ..لكن لما طلع البيان الوطني الشريف للكنيسة بطوائفها .. دا كشف حاجات متوقعة جدا .. أهمها أنه حصل بلبلة بين بعض الناس.. ولقيت ٣ردود افعال
* ١..رد فعل فئة الناس المؤمنة بجد ..اللي شافت الله بالفهم والحكمة ..شافته في الشوارع .. بين اكوام المصابين والمفزوعين .. الناس اللي أشادت بقوة بالقرار ..واللي كانت بتصرخ ليل نهار تنادي بكل محاذير ومخاطر التجمعات في كل مكان بمافيها دور العبادة ..ولسه بينادوا بضرورة التزام البيوت.. بل وبفرض حظر التجول للقضاء على حالة اللامبالاة من الكثيرين بالشوارع اللي هي حاتكون لاقدر الله السبب المباشر لانتشار العدوى وتفاقم الوضع لكارثة ...
** رد فعل تاني من مؤمنين وسط. ." لا أنت بارد ولا أنت حار.. أكاد أن اتقيأك ".. اللي هو المؤمن المرجيحة ..ومنهم اللي اتخلبط وشك .. بتوع أبونا هو اللي قال .. يعني معاهم معاهم ..عليهم عليهم لحين اشعار آخر ..دول بقى جابوا ورا بسرعة ..
وفجأة اتغير موقفهم ..ومن بعد ماكانوا رافضين الغاء القداسات واتحسروا أوي لما اتلغت الاجتماعات الروحية ..(ماهي حاجة بتسلي ) ومقتنعين أن التناول بالمستير هو العقيدة نفسها وأنه مافيش أي فرق بين دم المسيح والمستير مهما حاولت تفهم .. دلوقت كلهم موافقين ..
فتسمع تعليقات زي : قرار رائع ...
.أو " ياسلام دا موقف بطولي للكنيسة "
..
أو " يالله مايجراش حاجة رغم أن الكنسية كانت بتفك عننا شوية برضه وبتسلينا واحنا في وقت الصوم.. .." ..
أو " وهو ينفع ..يعني مش غلط كدا ....".
أو "واحنا مالنا ما البابا هو اللي قال" ..
أو "ايوه صحيح ..دا حتى أبونا قال لاتجرب الرب إلهك ". وغيره .و..و..)
دول فجأة اكتشفوا كمان آيات في الكتاب لأول مرة بيعرفوها ..زي مثلا "تعالوا ادخلوا بيوتكم واغلقوا أبوابكم ..تواروا قليلا ياشعبي إلى أن يعبر الغضب ..أشعيا ٢٦"
لكن ..مش مهم أنهم مش عارفبن لكن لو قولت أدامهم اسم يسوع يتنطط ويقولك .. أه أنت بروستانتي. ويهرب منك كأنك فيرس مثلا ...
*** رد فاعل ثالث حصله صدمة .. وأن دي مؤامرة من إبليس لحتى يقفل الكنيسة ويمنعنا من الصلاة .. البابا الخاين .. واحنا مايصبناش حاجة .. و وفجأة يدخل في مرحلة الاضطهاد عليه وعلى الكنيسة ..
( ملحوظة كدا .. وبالمناسبة برضه ..غلق الجوامع ياجماعة ماهوش تحدي ولا خنوع من الحكام زي مابيدعي البعض ..الأ مر فعلا خطير وجدا. والمصلحة العامة لها الاعتبار الأول و الأهم.. دي حياة شعب ..بس يارب نعبر المرحلة دي بسلام )
طيب نرجع تاني .. كل دا حله بسيط ..
أولا ماحدش منع حد من الصلاة .. قاوموا الشر .. متى صليت فادخل مخدعك وصلي فالرب اللي بيشوف في العلن بيشوف في الخفاء برضه..
.
* قاوموا إبليس بجد والتزموا البيوت ..أيوه . اعتبروها فرصة رائعة .. لما نعمل بيوتنا مذبح صلاة مع أسرنا. دي مقاومة للشرير .."أما أنا وبيتي فنعبد الرب " . ..
الأسبوع الثالث والرابع أهم مرحلة . دا حايحد جدا من فرصة نقل العدوى ..ودي حماية لينا ولأولادنا وللأخرين
..
* متاح للجميع متابعة القداسات وكل طقوس الصوم المقدس من قنوات أغابي والسي تي ڤي "الكنيسة التى بيتك "
*صلوا كل حين ولا تملوا .. نرفع صلاة بجد من القلب . الخطر لو استهترنا بيه وزاد مش حانقدر عليه. .ربنا يحمي شعبنا كله ... شوفوا فواجع البلاد التانية. شوفوا الجثث في الشوارع والنحيب في كل بيت واتعظوا. واحترموا قرارات ومجهودات الدولة الجبارة لسلامة الجميع
دا وقت لازم نقف فيه جنب بعض أوي ..بلدنا تهمنا ..
*اما اللي شايف أن قرارا الغلق دا ضد إيمانه ومعتقده . فممكن جدا بدل الغضب والشتايم واللعنات ينزل يتطوع زي الشباب المحترم اللي في الشوارع ( ربنا يحفظ حياتهم ) اللي معرضين حياتهم للخطر علشانك وعلشاني ..
اللي بيقدموا للناس المطهرات والكمامات واللي بيرشوا مقابض أبواب السيارات بالكحول و اللي واقفبن على أبواب المولات والسوبر ماركت يعطوا للداخلين الماسكات والجوانتيات .
واللي بيساعدوا عمال النظافة ويجمعوا القمامة بنفسهم وبيردموا المكان بالرمل اللي بيشيلوه على ظهرهم (ربنا ينجيكم ياحبايبي يارب)
هم دول اللي بيقدموا حب ورحمة بجد ..دول الشرفاء من غير صوت ولا إزعاج .. وهي دي الصلاة اللي بتتسمع ..وهم دول المسيح اللي ماشي يرفع التعب والخطر والفزع من الشواع من غير تمييز ..
بس كدا .
