كتبت – أماني موسى
قال المخرج عمرو سلامة، تعليقًا على تصاعد أعداد الإصابات بفيروس كورونا حول العالم، لو لسة في حد مش متابع.. إيطاليا بيكلمونا ويصوتوا، من حاضرهم اللي هو المستقبل اللي مستني الدول الثانية، بيقولولنا إنهم استهتروا بالموضوع دلوقتي في حوالي 500 واحد بيموتوا في اليوم الواحد، ارقام موتى أكثر من اللي بتحصل في الحروب.
العناية المركزة ماعدش فيها مكان، الدكاترة مش ملاحقين وهم نفسهم بيعيوا، اجهزة التنفس خلصت، مافيش أقنعة، وكلها كام يوم والنظام الصحي كله ينهار ومش هيعرف يعالج حد.
وتابع سلامة في تدوينة عبر حسابه بالفيسبوك، كل ده علشان الناس كانت فاكرة انه "مجرد أنفلونزا" او بيقولوا حاجات شبه "خليها على الله" أو "الإعلام بيهول" أو "الناس اللي بتموت من أمراض ثانية أكثر"، أمريكا وألمانيا نفسهم لما العدوى توصل أشدها نظامهم الصحي برضه هينهار، دول إيطاليا وأمريكا وألمانيا اللي اصلا دول غنية وعندها إمكانيات محترمة، وإنت كل المطلوب منك تقعد في البيت وماتنزلش إلا للضرورة القصوى، بس، بسيطة.
مضيفًا، فكر في أي حد بتحبه كبير في السن او عنده مرض مزمن، وهو مش لاقي سرير عناية مركزة، مهما كان مقتدر وعنده واسطة، وهيموت ومش قادر تلحقه، نزولك من البيت بيزود فرصة السيناريو ده انه يحصل.
وأختتم بقوله، لو هتموت من الجوع لو مانزلتش انزل وخذ كل احتياطاتك، غير كده اقعد في البيت واقفل على نفسك، وماتكونش شريك في صنع أزمة هتموت عدد ضخم من البشر، وياريت كمان نوصل الكلام ده للناس اللي معندهاش نت ومش متابعة حجم الموضوع.
