شريف رسمي
ايطاليا من ٣ اسابيع كان عدد المصابين بكورونا فيها ١٧٠ حالة اليوم وصل عدد الاصابات الي ٢٥ الف حالة و اكثر من ١٨٠٠ حالة وفاة
ايطاليا اللي بيعيش ٦٠ مليون من سكانها علي مساحة ٣٠٠ الف كيلو اللي هي كامل مساحتها لان معندهاش صحاري .. انتشر المرض بالاساس بسبب السلوك المستهتر بتاع شعبها الاقرب لسلوك المصريين و تأخر الحكومة
نيجي لمصر اللي بيعيش ١٠٠ مليون مصري و ملايين من جنسيات تانية علي اقل من عشر مساحتها يعني علي اقل من ١٠٠ الف كيلومتر لان ٩٠% من مساحة مصر صحاري و سلوك الشعب المصري بل و قطاعات كبيرة من الدولة في منتهي الاستهتار
اول امبارح فرحنا كمحاميين لخبر اعطاء اجازة اسبوعين للمحاكم و النيابات ما عدا الشغل الاداري اسوة بأجازة المدارس و الجامعات و اتفاجأ اليوم بتحقيق نيابة مع متهم و اما اروح نيابة قليوب الاقي متهمين متكلبشين في ايدين بعض في مشهد مرعب و اعداد كبيرة جدا من المحاميبن و الاهالي .. الميكروباسات مزدحمة عن آخرها .. طوابير العيش زحام غير عادي لان الافران بتقفل الساعة ١٢ظهرا .. العيال بتلعب علي ترابيزات البلياردو في الشوارع بنفس العصاية بيبدلوها مع بعض و الكل محني و الوجوه و الانفاس في وش بعض .. طوابير علي اكشاك اللحوم المدعمة .. اسواق الخضار زحمة كأي يوم عادي .. ماكينات ATM طوابير و مفاتيح الماكينة عدوي لكل الايدين .. الناس علي القهاوي في تجمعات بيلعبوا دومينو و طاولة ..
كل اللي كتبته شوفته بنفسي لمجرد اني نزلت الشارع ٣ ساعات للحضور مع متهم في تحقيق نيابة .. علشان كدة انا متشائم جدا جدا جدا و لو فضل نفس سلوك الشعب و بعض قطاعات الدولة بنفس الشكل ده هتكون الكارثة عندنا اسوأ من ايطاليا و افتكروا البوست ده قوي
يا شعب مصر ارجوكم هنروح كلنا في داهية و الحل بسيط و غير مكلف اننا نلزم بيوتنا و ما ننزلش الشارع غير لحاجة مهمة .. الحكومة اعطت اجازات للبقاء في المنازل مش للقعاد علي القهاوي و الزيارات المنزلية و الخروج و الفسح .. استهتاركم هيضيع اقرب ما ليكم .. اللي ابنه هيتصاب و اللي امه هتموت .. و اللي اخوه هيتحجز في مستشفي
