بقلم مينا ميلاد عازر
لو قلت لحضرتك أن الصدق فيه النجا لن أكون كذاباً، فأنت تعرف أن الصدق منجي والكذب مهلك، والنجا حلم الكل، وعشان كده لازم الكل يبقى صادق، وعشان كده قررت أن أقول لحضرتك الحقيقة التي اكتشفتها أن معالي الوزيرة فايزة أبو النجا يجب أن تكون مثل أعلى لكل من يريد أن يبق على كرسيه رغم كل الأعاصير، فأنا أتحدى أن يكون هناك وزير في أي دولة في العالم قام بها ثورة وبقى إلا هي، استطاعت أن تستمر- سيبك من أن الثورة لم تحكم، ولم تنجح، ولم تحقق كل أهدافها- رغم كل الوزراء الذين تغيروا ورحلوا، يا راجل دي الثورة إللي بتقول إنها لم تنجح دي مشت رئيس جمهورية ورئيسي وزارة بوزرائهم إلا هي.
وفي ذلك سبباً ساقوله لحضرتك، وهو إن السيدة فايزة بقت لأن معها نوتة تليفونات قادة العالم ووزراء خارجيتهم، ومحتفظة بها في مكان سري ما حَدِّش يعرفها غيرها، ولو مشوها مش حايعرفوا يكلموا حد من القادة والزعماء ووزراء الخارجية، الأمر إللي حايقطع مصر عن العالم، وده سبب، وفيه سبب كمان بيقولوا إن معاها نوتة كاتبة فيها المعونات والمنح إللي بتاخدها مصر، ومن مين؟ وهي كام؟ ومجموعها وتفنيطتها وكل البيانات دي، ولو مشيت مش حاتديها لحد، وساعتها الكل حايضحكوا علينا ويلبسونا في مبالغ ما دفعوهاش لنا، ويبقى كده مصر بتخسر يا جماعة لإنها لو مشيت مش حاتقول لحد النوتة دي فيها إيه؟ ويُقال إن السيدة فايزة لها نصيب من اسمها، فهي دائماً فايزة على أي حد يحاول يشيلها من مكانها وإللي بيجي عليها ما بيكسبش.
ويقول لي بعض الخبثاء، أن السيدة فايزة ممضياهم على إيصالات أمانة ولو مشيت حاتطلعها وتجرجرهم في المحاكم والأقسام، وساعتها حاتبقى فضيحة بجلاجل للكل، وطبعاً هم ساكتين عشان مش عايزين يأكلوا عيش وحلاوة في السجون. يا جماعة الموضوع كبير بصراحة، وإنتم مش مقدرين الموقف، السيدة فايزة أبو النجا معاها كل حاجة معاها كل خيوط اللعبة من الآخر، كل المعونات وأين ذهبت؟ وكيف ذهبت بالخطأ لحسابات غير المراد الذهاب إليها؟ وكله تحت إيديها، يعني لو وقعت الكل حايقع، فهمتم بقى. يعني كان لازم تضغطوا علي وتلاحقوني بالسؤال عشان أخر بالكلام كده. عامةً أنا ما قلتِش حاجة، ولو الحتة دي ما إتنشرتش حضرتك ما تتخضِش، وما تسألنيش طب حاعرف منين إنها ما إتنشرتش؟ لإني أنا نفسي مش حاعرف أقول لك إزاي تعرف؟ لكن أنا متأكد إنها حاتتنشر بإذن الله. ولا تنزعج عزيزي القارئ، فنحن في دولة ديمقراطية، منذ رحيل مبارك الكل يقول ما يريد والنظام يفعل ما يريد. والنظام الآن في يد الإخوان. والإخوان عايزنها لإنهم عارفين إنها الوحيدة إللي تقدر تجيب المعونات والمنح طب يمشوها إزاي؟ يللا يا بخت من كان اسمه فايزة في بلد شعبه مهزوم.
المختصر المفيد إنتِ بالذات ارحلي.
مينا ملاك عازر
 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :