كتبت - أماني موسى
نشبت خناقة على مواقع التواصل الاجتماعي بين وائل عبد العزيز، شقيق الفنانة ياسمين عبد العزيز، والفنان أحمد العوضي، حيث قام شقيق الفنانة ياسمين عبد العزيز بنشر رسالة شديدة اللهجة لشقيقته والعوضي بشأن ارتباطهما.
وقال وائل في تدوينة عبر حسابه على الفيسبوك: "بصى يا ياسمين يا عبد العزيز يا أختى، أنا معاكى وفى ضهرك من وأنتى صغيرة شيلت مشاكل كتيًر بسببك من وأنتى عيلة صغيرة، بداية من مشاكلك مع الشاعر وبرادة وأنتى عارفة إن أنا أتأذيت فيها إزاى وقضية الشغالات مؤخرًا غير قضية الضرب اللى كانت بينك وبين بنت هشام سليم الممثلة اللى لبستيها التورتة فى وشها".
وأضاف، "وقفت جمبك بكل ما أملك من قوة أدافع عنك فى كل موقف صعب مر عليكى ونسيت حياتى ونفسى عشانك وبقى كل همى أنا ووالدتك، إنك تكبرى وتبقى نجمة فى مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللى ساندتك ووقفت جنبك فى طلاقك، لكن هنهرتل وتروحى تعرفى واحد أصغر منك بـ10 سنين لا من سنك وتتصورى صور مالهاش أى لازمة على حساب سمعتك وسمعتنا، لا ومحدش هيسمح، من أمتى وإحنا بنعمل أعياد ميلاد وتنزل على السوشيال ميديا، من أمتى الناس بتجيب فى سيرتنا؟ ونقعد نتعاكس على السوشيال ميديا؟.
مستطردًا، "ومع ذلك حياتك وأنتى حرة فيها، أنا هتكلم على الشق اللى يخصنى، أنتى مقاطعة كل العيلة عشان تعملى اللى على مزاجك، إحنا دلواقتى وعايزين نفهم العلاقة دى إيه ورايحة على فين".
وأختتم بقوله، "أما بالنسبة للأخ اللى ماشى وراكى فى كل حتة وشايفك البيضة الدهب اللى هتفقسله كل يوم.. أحب أقولك يا راجل لما تيجى تدخل بيت تدخله من بابه يا راجل!! وتقعد مع رجالة البيت!!.. دى الأصول وده الاحترام.. وطبعًا لأنك عارف أنك مرفوض رافضًا باتًا فاعمرك ما هتعمل ده ومعندكش غير طريق الشمال اللى أنت سالكه من سنين مع بنات الناس!!.. أنا من رأيى كفاية عليك البطولة اللى أخدتها والعربية المرسيدس الهدية، وتركز فى شغلك وتسيبنا فى حالنا لأن طول عمرنا فى حالنا ومحدش سامع عننا حاجة وملوش لازمة جو الصور والمعاكسات ده وأنا مبخفش من تهديد حد".
ورد أحمد العوضي بمنشور قام بحذفه بعد دقائق، يرد فيه على شقيق ياسمين قائلاً: باب إيه يا بني ورجل مين، مشيرًا إلى أن الأخير لا يتحمل مسؤولية الصرف على ابنه وأن ياسمين هي من تتولى دفع مصاريف مدرسته، وأنها دائمًا ما تقوم بمسؤولية الصرف على شقيقها، قائلاً: "انهى بيت اللى ادخله من بابه.. ان كانت هي اللى بتصرف عليه وعلى ابنك اللي مخبيه وراميه وهي بتدفعله مصاريف مدرسته.. باب ايه يا ابنى ادخله هو انا شفت راجل واقف جنبها.. دي واحدة انت مبتعملش حاجة غير أنك بتستنزفها هي ومامتها.. باب ايه يا ابنى الى هدخله من بابه واكلم واحد بيتكلم على عرضه ولحمه قدام الناس.. يا ابنى انا من عين شمس منطقية شعبية اتربيت على ان الأخت والام والست الكلام عليهم من الكبائر.. عربية ايه يا ابنى انا اجرى الحمد لله يعيشني كويس ويجيبلي عربية حلوة وبيت كويس.. بمجهودي وشغلي مش على عرق واحدة ست.. باب ايه يا حبيبي اللي ادخله وانت أصلا عايش باسمها.. انا شقيت على حالي بعرقي.. لكن انت فشلت في كل شيء فشلت كممثل وفشلت كأب وفشلت كأخ وفشلت كبنى ادم".
رد أحمد وياسمين وإعلان حبهما
من جانبها ردت الفنانة ياسمين عبد العزيز بصورة تجمعها مع أحمد العوضي وأرفقتها بعبارة مختصرة "بحبك يا أحمد"، وبعدها بنحو 10 دقائق نشر
أحمد العوضي نفس الصورة قائلاً "بحبك يا ياسمين" ليعلن الثنائي حبهما على الملأ بشكل مؤكد رغم فارق العمر إذ تكبره ياسمين بعشر سنوات.
شقيق عبد العزيز يرد ولا يصمت!
إلا أن شقيق الفنانة ياسمين لم يصمت عند هذا الحد، بل قام بالرد أيضًا في منشور عبر حسابه بالفيسبوك، قائلاً العوضي ليس هو من يحدد فشله أو نجاحه، وأن العوضي اختار وقت ضعف شقيقته ومرورها بمحنة طلاق لافتا إلى أنه ليس الشخص المناسب لها.
