بقلم- لطيف شاكر
صحي النوم يا بلدنا.. قبل ما يفوت الأوان
قبل ما يخطفك غراب البين وأزلام العربان
شد حيلك وانتبه لمزبلة السلفيين والإخوان
حياخدوك لكهوف أفغانستان ومستنقعات طالبان
بعد أن حجبوكم وخمروكم وخلوكم شبه إنسان
ويرجعوك يا وطن لأسود الأيام وأسوأ الأزمان
عايزين يخلوكي يا مصر إمارة عربية
ولحية شعثة وزبيبة وطاقية وجلابية
ومسواك في جيبه وجبهة ظلامية
وفي قلوبهم عداوة وبغضة وكراهية
بيتنكروا يا مصر لتاريخك وأمجادك
مع إنهم اتربوا في عزك وأحضانك
وشربوا من نيلك واستحلوا طعامك
واتنعموا بخيرك وسرقوا أموالك
لكن قليل الأصل دناوته غلابة
وعوده أعوج وزمته هلابة
والمخ جزمة قديمة ونعرة كدابة
وما بقاش ناقصك غير واحدة ندابة
تندب على حظنا الأغبر الهباب
وعلى نباح النواب والفلول الكلاب
نهبوا أموال الوطن بعضة الأنياب
وراحوا يتنطعوا على الأبواب
وما عدش سوى الحسرة والعتاب
يا شعب مصر ليه إنتم ساكتين
وعلى الجهل والتخلف والعفن صامتين
والسيرك شغال والبهلوانات دايرين
يسمموا بفتاويهم عقل المصريين
هرج مرج زعيق ومجلس مجانين
هو ده اللي اتشطروا فيه حقيقي هايفين
والمتنطعون على الكراسي شلة مهرجين
إزاي يعملوا دستور وهم أجهل الجاهلين
حيفصلوه على شلة متأسلمين معتوهين
ومصر رايحة في داهية واحنا كمان نايمين
وحنصحى إمتى ونرجع مصر للمصريين؟
يا خسارة يا وطن... يا أبناء مصر الفراعين
على دستورك حيهببوه عصابة الوهابيين
ومجلس شورى ملهوش لازمة
قرارته ذي الحافية من غير جزمة
وأعضاؤه فاضيين وعاملين زحمة
ذي الخضار البايت يتباع بالحزمة
وهي البلد يا ناس ناقصة أزمة
ورزق الهبل على المجانين
كل من هب ودب بيحلم بكرسي مصر
بيهرولوا إليه وعينهم  بس ع القصر
والتاريخ بيعيد نفسه من عصر إلى عصر
وابك يا وطن وولولي يا مصر
عايزين يحكموك يا مصر شوية مهابيل
وبيتنافسوا على الكرسي أسوأ الرجاجيل
تافه حرامي جاهل وكلهم عالة وعواويل
حنحطهم على الرفوف ذي الكوبايات والفناجيل
ونقول حادي بادي وبالقرعة يقع أحد البناطيل
ويحكمنا العريان والحافي وخلونا شعب مخابيل
ومفيش منهم فايدة ولا دقيق ينزل من الغرابيل
وابكوا ع الوطن الحزين بالعويل والمواويل
وعليك يا مصر السلام وكفاكم مكاتيب ومراسيل

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :