من منكم بلا إثم ..
ماجده سيدهم
ولما جم علماء الدين ووجهاء المدينة وكبارها وهم مجرجرين ست من شعرها وضربينها موت ومقطعين هدومها ..وقالوا له يامعلم الست دي مسكناها مع واحد في خطية .. والحكم عليها هو الرجم حتى تموت.. واحنا مجتمع شريف ومحافظ ولايمكن نقبل يعيش بينا واحدة فاسقة منحطة وزانية زي دي علشان تنشر بينا الفسق والفساد .كلا والف كلا ..
. المفروض نرجمها.. لكن احنا عاوزين نعرف رأيك ...
قرب منهم و بص في وشوسهم أوي ودقق النظر في عيونهم اوي أوي ..زي اللي بيقرا قلوبهم وضمايرهم بصوت عالي
طبعا اتهزوا. واتخرسوا وقالهم: اللي منكم نضيف من جوه يتفضل يرجمها دلوقت ..الحجر أدامكوا ...
هو دا اللي بيحصل في مجتمعات السبحة والمصلية .. كل شيء مبتذل بيتم في الخفا ..كل الانتهاكات تمام زي الفل مادام القناع متوضي بالتقوى .. ..امسك كل الحجر وارجم بالطوب ..سن سكاينك وادبح ماترحم ..اوعي السماحة او ضميرك تخليك تسامح .. أو تساعد حد سقط أو في ضيق ..فتش أوي عن ضعف الناس واكشف عوراتهم وخوض في الأعراض ..بس إياك تقع من ايدك السبحة او المصلية...أوعي تتهز ويبان عارك أدام الخلق
الفرق بينا وبينها أننا لسه مستورين ..دي كل الحكاية
اللي مابيرحمش مش ها يترحم ...واللي مابيستر جاي له يوم ....الحرامي بيتكلم عن الأمانة.. وعديم الشرف أول من يتكلم ويدافع عن الشرف .. دا جبروت المجتمع المعلول بالتقوي والفشل وعدم الثقة بالنفس ..
