كتبت - أماني موسى
أشاد المخرج عمرو سلامة بالألبوم الجديد الذي طرحه المطرب عمرو دياب، قائلاً: ظواهر عمرو دياب الغير طبيعية.. إليك عشر أسباب توضح ليه عمرو دياب مش بس ظاهرة لكن مجموعة من الظواهر الغير طبيعية:
1. لأن أغانيه حلوة طبعًا، بس مش بس كده.
2. عمرو دياب أغنيته "ميال" كسرت الدنيا في أوائل التسعينات، وأغنيته "يتعلموا" كسرت الدنيا برضه بعدها بحوالي ثلاثين سنة، ثلاثين عام من تكسير الدنيا.
3. لأن في نظرية مشاعة برا بتقول إن كل فنان عنده "العشر سنين نجاح" وبتقول إن كل فنان عنده عشر سنين نجاح وبعدها بيبدأ يقع أو شغله يكون متوسط، وفي ناس قليلة استثناء للقاعدة ديه، إحنا يمكن في مصر عندنا كذا استثناء من دول، زي عادل إمام وأم كلثوم وطبعًا عمرو دياب، ناس طلعت وناس نزلت وناس اتشهرت وناس اتنست وهو على وضعه.
4. عمرو دياب هو المثال الواقعي للشخصية الخيالية "بينچامين بوتون" اللي كان مولود عجوز وبيصغر، لو شوفت صورته وهو جاي من بورسعيد في أول مشواره وصورته دلوقتي هتفتكر إن صورته دلوقتي هي الأصغر.
5. عمرو دياب بسببه في جواكيت اتباعت، في حلاقين اتطلب منهم قصات غريبة، في بلوفر مصر كلها لبسته، في رسامين تاتوز فتحوا استوديوهات.
6. عمرو دياب خلق أجيال من ملحنين وكتاب وموزعين، وكل فنان منهم كان في قمة نجاحه بسبب أغانيه.
7. عمرو دياب كممثل يمكن ماكنش رائع بس بكام فيلم قليلين نجح في انه يشارك في فيلم قعد مخوفنا كأطفال كل طفولتنا (العفاريت) وقدر يشارك في فيلم تحول لثيمة وشعار ونشيد جيل كامل (أيس كريم في جليم)
8. علشان ماتكلمش في أمور شخصية لإنه مايصحش، بس شابو عمرو دياب في مساره في علاقاته الشخصية.
9. الأغاني المصرية دايمًا بتسرق من أغاني أجنبية، لكن عمرو دياب هو اللي عكس الآية، وبقت أغاني أجنبية تسرق من عمرو دياب.
10. أغانيه شماعات بنعلق عليها ذكرياتنا ومحطات بنعلم بيها قصصنا، أنا فاكر إيه أغنيته اللي كانت شغالة لما جالي أول تليفون من بنت معجب بيها، الأغنية اللي بعتها لواحدة علشان أعلن عن حبي ليها، الأغنية اللي سمعتها بعد الإنفصال من علاقة، الأغنية اللي رقصت عليها أول مرة مع واحدة، خناقاتنا أنا وصحابي في العربية علشان مانحطش شريط غير بتاعه كل طريق الساحل.
وأختتم سلامة تدوينته عبر حسابه بالفيسبوك، "طبعًا عينينا عليه باردة ونمسك الخشب ونقرأ المعوذتين ونتماله التوفيق في مساره الفني اللي واضح إنه هيفضل دوما كإنه في لسة بيبدأه".
