كتبت - أماني موسى
قال الإعلامي عمرو أديب، أن قضية مقتل سارق في منزل نانسي عجرم، البعض ينظر إليها نظرة جنائية ولكني أنظر لها بنظرة اجتماعية.
مستطردًا، نانسي عجرم نموذج للحياة الاجتماعية الحلوة، فنانة سمعتها حلوة، محبوبة من الكبار والأطفال، لديها معجبين بكل العالم العربي، زوجها رجل وطبيب ناجح، ولكنها فوجئت بالتوحش بتاع السوشيال ميديا، وفجأة أصبحت تدافع عن نفسها وباتت في حالة صدمة من ردود الأفعال.
وشدد أديب في برنامجه "الحكاية" المقدم عبر شاشة MBC مصر، السوشيال ميديا باتت مسرح للتوحش بلا سبب، فتجد أشخاص يتنمرون بك ويصبحوا في حالة هجوم شديد دون دافع.
وتساءل أديب، هو أنا لما يجي واحد معاه مسدس وداخل على أوضة مراتي وعيالي المفروض أعمل له إيه؟ أجيب له كابتشينو؟ مشددًا بقوله، في أمريكا القضية دي محدش يتكلم فيها، في أمريكا دة دفاع عن النفس ويسمح باستخدام السلاح للتعدي مش للسرقة ومن حقي أمسك المسدس وأفرغه فيك، إنما أنا قاعد في بيتي ومراتي وعيالي داخل عليهم واحد ملثم بمسدس أقوله لو سمحت ممكن أشوف بس المسدس الأول شغال ولا لعبة وفي كم رصاصة؟ طب وأنت جاي تقتلنا بجد ولا عايز تسرق بس؟
وقال أديب، من أحقر ما قرأت على السوشيال ميديا أحدهم يقول يعني هو الراجل كان هيسرق إيه ما عندهم فلوس كتير؟ متساءلاً" دة كلام يا جماعة؟
وأضاف أديب، أنا أعرف نانسي من زمن، شخصية نظيفة فعلا، ودلوقتي كل واحد عايز يشتهر يتكلم في موضوع نانسي، كل دة عشان إيه؟ عشان واحد داخل يسرق؟
