يصعب عليا حقيقة فهم بعض الأمور التي تحدث من حكومتنا الغراء ,

فبعد أن حاول الراحل توفيق الدقن في محاولات متكررة بالإقناع مره وبالترهيب عده مرات لكي يقنع الراحل عبد المنعم إبراهيم بأن العلبة فيها فيل في فيلم طاقية الإخفاء ,
 

ومع مرور الوقت أصبح عبد المنعم إبراهيم يجرى مهرولا ومجيبا بأن العلبة فيها فيل   ,

وهكذا ينتقل وضع الأفلام من الخيال  إلى الواقع  فبعد أن تم الاستفتاء على مواد الدستور في عده مواد محدودة   خرجت النتيجة  علينا مختلفة في صوره إعلان دستوري متعدد المواد ,
 

وهكذا ابتلعنا نتيجة الاستفتاء التي تم فيها غزو الصناديق  في انتصار ساحق  وجاءتنا عده مواد  لم نستفتى عليها على طريقه العلبة إللى فيها فيل ,

ولكن  هل بلغت اللامبالاة والامنطق والإستهذاء بعقليه الشعب المصري أن يحاولوا إقناعه بأن العلبة فيها فيل وغزال وأسد كمان 
 

أديني عقلك في إللى جاى :

ذهبنا يوم الثلاثاء الماضي الموافق 14 فبراير لكي ننتخب أعضاء  مجلس الشورى في ألقائمه والفردي  وكل منا يعلم لمن يصوت ولكن حين دخلت أللجنة تم

إعطائي إستماره انتخاب واحده خاصة بالفردي فسألت عن الثانية الخاصة بالقائمة فأجابني القاضي بكل أدب :

انتخابات ألقائمه الثلاثاء القادم يا دكتور

طبعا شكرا  وخرجت لأسأل الجمهور عن السبب فأجابوني إن القوائم ليست جاهزة حيث أن قائمه حزب الوفد لم تنتهي  لذلك تأخرت انتخابات ألقائمه ,

لحد هنا كويس  !!  العلبة بقى فيها فيل بس !!!
 

لكن بعد كده أتضح لي إن العلبة هيكون فيها جنب الفيل الغزال والأسد  !!! إزائ  ؟؟؟؟
 

قالك إن الانتخابات في دائرة الأقصر لانتخابات الشورى  هاتكون يوم الثلاثاء  21 فبراير للقائمة ويوم الأربعاء 22 فبراير للقائمة والفردي  !!!

عروستي  ؟؟؟  طب  ليه  ؟؟ طب فهموهالى  أنا فهمت واقتنعت إن العلبة فيها فيل , إقنعونى إن العلبة فيها فيل وأسد وغزال !!!

هو مش عدد الناخبين إللى هينتخبوا  الفردي  هو نفس العدد إللى هينتخبوا ألقائمه  ؟؟؟؟؟؟؟؟؟؟؟؟؟؟؟

طب ليه بقى تبقى القايمه يومين والفردي يوم   ؟؟؟
 

طب هو إللى هيروح ينتخب القايمه يوم الثلاثاء  هيحط فى صابعه فسفور علشان يثبت إنه انتخب , طب هتبقى لازمه الفسفور إيه يوم الأربعاء  ؟؟

طب الناس إللى بتأجر عربيات علشان تروح لجانها الإنتخابيه لو راحت يوم الثلاثاء  هتأجر عربيه برضه علشان تروح الأربعاء  ؟؟

طب أيه لازمه العك ده والاستخفاف بالعقلية المصرية في  إن أحنا نعمل اللي أحنا عايزينه وبراحتنا وبدون ما يكون فيه حق للشعب إنه يسأل ليه كده  ؟؟؟

ولا في الأمور أمور  وحيلهم بينهم  وفيه ترتيبات ثانيه  !!!!

بصراحة  ده عك مثير للريبة والشك  ,
 

أنا مقتنع إن العلبة فيها فيل  , لكن بصراحة يبقى فيها فيل وغزال وأسد   

فدى واسعة شويه  , باريت حد يفهمها لي من السادة المسئولين ,