بقلم : أشرف فايز
آه ياوطن ... لساك فيه شئ بنخاف عليه
ونحن ليه
رغم الوجع ... اللي مدارينا
ومداريه
وهاأقولك إيه ؟؟؟؟؟
غير نفسي قلبك ينكشف عنه الحجاب
يفتحلي باب ... والمس إيديك
وتهد سد ..... وتخلي حد ...
بين اللي حبك حب جد
واللي معاديك
آه ياوطن ٠٠٠ لساك فيه شئ بيخضنا
ويهدنا
مادين إيدينا ليك وبرضه تصدنا
تصدنا ٠٠٠ ليه
وهاأقولك إيه ؟؟؟؟؟
آه ياوطن ٠٠٠٠ واخدنا راجع للورا
وياهلترى؟؟؟
دم الولاد ٠٠٠٠ خلى البلاد متحرره ؟؟
ولا أسيره لماضيه
وهاأقولك إيه ؟؟؟؟؟
آه ياوطن ٠٠٠ وكل خطوه بتفترق
وبتتخنق
وحلم الولاد ٠٠٠٠ بيتسرق
قدام عينيه
وهاأقولك إيه ؟؟؟؟؟
آه ياوطن٠٠٠٠ وكل آهه بميت شهيد
ومافيش جديد
حاكم عنيد ..... همه لاول يستفيد
من وطن ٠٠ منصوب عليه
وهاأقولك إيه ؟؟؟؟؟
آه ياوطن ٠٠٠٠شايفك مسلمله القياده
وبالزياده
بتحبه جد ؟؟ ٠٠٠٠٠ ولاخايف م البياده
ومن البيريه
وهاأقولك إيه ؟؟؟؟؟
آه ياوطن ٠٠٠ الكل فيه عمال يبيع
قرب يضيع
وخايف اتهم الربيع
جه وغموله عينيه
وهاأقولك إيه ؟؟؟؟؟
آه ياوطن ٠٠٠٠٠ شكلك بقيت وطن غريب
ولا مجيب
والعجيب ٠٠٠ ماعدشي فيه ف قاموسنا عيب
ولاشئ غلط
وبنداريه
وهاأقولك إيه ؟؟؟
آه ياوطن ٠٠٠ ولسه برضه ملان بزيف
وماسكلي سيف
وجرحي أهو شغال نزيف
وكنت فاكرك هاتداويه
وهاأقولك إيه ؟؟؟؟؟
غير نفسي قلبك ينكشف عنه الحجاب
يفتحلي باب ... والمس إيديك
وتهد سد ..... وتخلي حد ...
بين اللي حبك حب جد
واللي معاديك
