الغريب والعجيب من فترة طويلة أن بقت موضة غريبة في دولتنا العظيمة لما يحبوا يهددوا الأمن يقتلوا المسيحيين، وساعتها قولنا إن الحكومة هي اللي بتعمل فتنة، وقامت الثورة وكل مصري فرح، أخيرًا الهم انزاح، وعن بيوتنا راح، وخلاص العمار جاي، والحق هيرجع لأصحابه، ودم أولادنا مش هيروح هدر، ولا يمكن هييجي يوم من الايام واحد يفتح بقه ويتظاهر علشان واحدة لأن الدين مش مجرد واحد أو واحدة، وبنينا أحلام كتير أوي، وبقينا نهتف ونقول "يحيا الهلال مع الصليب"، "مصر" مش ممكن تقع، والجيش والشعب إيد واحدة، والكلام الكتير اللي شوفناه في التلفزيون..

 

جت أحداث "صول" قولنا مش مشكلة، لسه في فلول شغالة وأهي عدت، ييجي وراها "ماسبيرو" نقول قضاء ودول مجرمين وأهي عدت، لكن اللي اكتشفته إنها بقت موضة، موضة غريبة وعجيبة ومش عارف إيه المقصود منها؟ موضة إن البنت لو وقعت في زنا نشوف الأول هل اللي زنت معاه مسيحي ولا مسلم علشان لو مسلم أهو يبقى عيل وغلط إنما لو مسيحي يبقي يتفضل من غير مطرود هو وكل المسيحيين اللي في المكان! ليه بقى؟ علشان متحصلش فتنة ونهدي الأمور علشان إخوتنا المسلمين.

 

ولما بنت ميكنش ليها مزاج من جواز وتختفي لازم كنيسة تتحرق وناس تموت!! ليه؟ السؤال مش محيِّر، علشان يبقى في حافز إن البنت تظهر، وكأن حرق الكنيسة بقى وسيلة ضغط على الحكومة، وبقينا نتعامل معاملة العبيد، ويجيبوا شيخ ويجيبوا كاهن ويقولك "العقلاء"، وكأن الناس اللي اتضربت دي ولا ماتت عبارة عن أدوات مطبخ ممكن الواحد ينزل السوق يشتري غيرها، وهيفضلوا يهجروا في المسيحيين لحد من نلاقي نفسنا على حدود 

"ليبيا" أو "السودان" وكل واحد شايل بؤجته وماشي..

 

وكمان من الغريب أكتر إن لما بنت مسلمة تختفي يبقى المسيحيين خطفوها، وكأننا مش من الشعب، كأننا عبارة عن عصابة مطلوب التخلص منها! وأتعصب أوي لما يقولك لازم نشوف العقلاء، طيب هما العقلاء دول مش بيلحقوا الموضوع من الأول ليه؟ قولتوا الثورة وأهي الثورة معاكوا، قولتوا "مبارك" كان حاميكوا أهو انتوا الحكومة دلوقتي، عايزين إيه تاني مننا؟؟ زمان عملتوا فيلم "حسن ومرقس وكوهين"، وبعدين شوية عملتوا "حسن ومرقس" وأعتقد إن بعد كام شهر هيبقي فيلم "حسن" لوحده؛ لأن "كوهين" طفش و"مرقس" اتقتل.

 

ارحمونا يا عالم، وارحمونا من فيلم المخططات، هي المخططات مبقتش موجودة غير على المسيحيين وبس؟ ولا الإسلام بقى عبارة عن شوية بنات هما اللي بيمثلوه؟ ولا كل واحد مسيحي يغلط يبقي المسيحيين في أنحاء الجمهورية تتحمل الغلط؟ فوقوا واعقلوا وارحمونا.