في ذكرى "مُولِد النبي"
القاهرة 4 فبراير 2012 -د. يوسف حبيب نقولا حبيب
أهديها اليوم لكل مصرية ومصري...

وحشاني يا مصر!...
سرقوا مِنِّك فرحتك... سرقوا منك حريّتِك... وحِلمِك!
كل حاجة عملوها عشان يكبروا ويكبروا...

جبنا الحلاوة وجبنا العروسة وجبنا الجَمَل،
وبقِت الحلاوة من غير حلاوة
وبَقِت العروسة من غير عريس
وبَقَى الجَمَل من غير سُكَّر... طعمُه ماسِخ وسخيف
سرقوا منك حلاوتك يا مصر وحرقوا كلمة مصري يا مصر...
دمعة عينيكي غالية عليَّ
وآهاتِك النهارده كبيرة عندي...

مُولِد فرحِتِك سرقوه
وكتبوا اسمُهُم وِجُوَّا الشَرّ خبُّوه... عشان الدم يكتر ويكتر ويِحلَوّ طَعْمُه بسُكَّر حلاوتَك يا مولِد
يا مصري في المولِد مهما سرقوا تاريخك
مَهما سرقوا فرحتك... وحِلمِك! أو سرقوا حريّتِك...
مهما كسروا ازازة ريحتِك
أو سرقوا تفكيرك!
مهما حرقوا واستخبُّوا وشاوروا بصباعهُم على القاتِل وشاوروا على القتيل
مهما حاولوا يرموا حلاوتك... آه!!!
هُمَّا اللي قتَلوا
وهمَّا اللي مسخوا كل ذكرياتِك
ومسحوا جَمالِك يا بلدي!...
في مولِد حببيبِك وفَرحِة ولادِك
وصرخة آهاتِك: "طَبْ فِين الضمير؟!"

هُمَّا اللي قتَلوا
وهمَّا اللي مسخوا كل ذكرياتِك
وقالوا: "دول ... هُمَّا ولاد الكلاب!"
وقالوا: "دول... همَّا أوساخ مجرمين وعديمي الضمير!"
قَتَلُوا القَتيل ومِشْيُوا في جِنازْتو وقَرُوا فاتحِتو
وخلُّلوا الناس تقول المشير!
يخرب بيوتكو
سرقتوا بلدي يا عديمي الضمير!...
يخرب بيوتكو
سرقتوا بلدي يا عديمي الضمير!...
أخدتوا ماضينا وتاريخنا وقُلْتُوا مَرير!
وسرقتوا بُكرة وقلتُوا مَصير!
وجنِّدتوا وِلادنا وقلتُوا عَبير!

يا مصري خُد عروستك واحضُنها واقطُم منها حِتـَّـة وقول بلدي دي حتَّة مِنِّيِ وأنا منها!
وقول دي دايـْبـَة في تُـفـافي زاي ما دُبت في تاريخها
زاي ما حَبِّـت حَبـيـبـْها
وحـَلِّـت بعيدُو بمولِد وفرحة
بمورجيحة ومدفع لعبة وبُمبِ وزَمبليتا ورقصة عيال وفرحِةْ كُبار مع دُعا في مولْدِ الكِبير!
يا مصري! يا روحي! طلعِت روحَك! الحَق قبل ما مصر تْطير!
وتروح منَّك فاتقول: "وحشاني يا مصر!..."
"سبتِك تروحي... فين حلاوتك وفين جَمَلِك وفين عروستِك!
خسارتِك يا مصر! ماعرِفتش غير أمسِك أسير!

فين حلاوتك يا حلوة يا ضِحكة يا مْأطْأطَة يا طِعمة يا بنت النيل وأٌم الدُّنيا...
فين حضارتك؟! هي ماتِت ومابقيش غير الشِخير؟...
فين دم ولادِك في القنال وسِينا وعِشق التحرير؟...
والدم الخفيف والأدَب والذوق والمَعدَن الأصيل؟

فينِك يا مصر يا مصري يا بتاعتي يا بلدي يا شمسي وْطَعم حِلو لذيذ؟!"...
فينَك يا نِسْري استنّى! ما ترُوحشي... أرجوك ما تموتشي... حاساعدَك!...
وبجناحاتك ارفعني! حاساعدك... عارف... الحِمْل بقى تقيل...
تعالَى يا مولد يا حِلو بمورجيحتك ورقصاتك وحلاوتك وعيالَك وناسَك
لسه فاكر طَعمك في بؤئِّي بس سامحني النهارده طَعم الحلاوة بقَى ماسِخ والريق ناشِف ومُر وْمَرير!
يا مصري! يا روحي! طلعِت روحَك! الحَق قبل ما مصر تسيبك وتطير!
وتروح منَّـك فاتقول: "وحشاني يا مصر!"...
"سبتِك تروحي... فين حلاوتي وجَـمَلـي وفين عروستي!
خسارتِك يا مصر! ماعرِفتش غير أمسِك أسير!
يا مصري! يا روحي!"
طلعِت روحَك! الحَق قبل ما مصر تِروح وتطير!
وتروح منَّـك على طول... ويجيلك يوم تنسى حتَّى انَّك تقول: "وحشاني يا مصر!"...
وتنسى مورجيحتك ورقصاتك وحلاوتك وعيالَك وصْحابك وناسَك وحبايْبَك... وقلبَك! يا مصري!
يا مصري!

في ذكرى بابا... "أبويا حبيب" أوَّل من أعطاني "حلاوة المولِد

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :