كتبت - أماني موسى
قالت إنجي سلامة، خطيبة الفنان الراحل هيثم أحمد ذكي، في تدوينة عبر حسابها بالفيسبوك، أنا بكتب الكلام ده و أنا مش قادرة اكتب حاجة بس قلت ممكن يكون فيه أي حاجة تفيد أي شخص تكون في ميزان حسنات هيثم وأنا بفكر نفسي قبلكم والله.
وتابعت، كلنا بيعدي علينا اختبارات في حياتنا وممكن نحس أنه اختبار كبير اوي وصعب بس ربنا قال: ( الذين إذا إصابتهم مصيبة قالوا إنا لله وإنا اليه راجعون أولئك عليهم صلوات من ربهم ورحمة وأولئك هم المهتدون )، يعني انا كلي لله ورجعاله علشان الواحد يفتكر أنه في الآخر ملوش غير ربنا و كلنا في الآخر راجعين له مهما قلوبنا تعلقت بأشخاص أو أشياء.
وأردفت، سيدنا يعقوب لما قالوا له إن ابنه سيدنا يوسف توفي قال: (فصبر جميل والله المستعان على ما تصفون) الصبر الجميل مش معناه أن مفيش حزن هو كان حزين جدًا على يوسف واخوه.. بس يكون فيه رضا... في ناس وقت البلاء ممكن تقول ليه يا رب عملت فيا كده او اشمعنى أنا ويقول أنا صابر بس ده مش معنى الصبر أني اكون معترضة على قضاء الله.
وشددت، دايمًا خلي شكوتك لله واتكلم معاه من قلبك، ربنا سميع قريب ودود مجيب زي ما سيدنا يعقوب قال كمان ( إنما أشكوا بثي وحزني الى الله وأعلم من الله ما لا تعلمون )، أي ابتلاء انت بتعدي بيه دلوقتي ليه أخر وليه جزاء وهتشوف جزاء الصبر ده في الدنيا والاخره بس خليك راضي بقضاء الله ربنا قال: ( سيجعل الله بعد عسر يسرا) ده وعد.
الصبر معناه اني راضية وعارفة إن في جزاء كبير أوي وفي خير (إنما يوفى الصابرون اجرهم بغير حساب) (والصابرين في البأساء والضراء وحين البأس أولئك الذين صدقوا وأولئك هم المتقون )، وقت البلاء ممكن تلاقي ناس كتير حواليك ربنا بعتهوملك يهونوا عليك لكن مفيش حد في إيده حاجة بجد غير الل،ه ومحدش هيبقى حاسس بوجعك غيره (ليس لها من دون الله كاشفة) (أمن يجيب المضطر إذا دعاه ويكشف السوء).
( إن يمسسك الله بضر فلا كاشف له الا هو ) ربنا أعلم بالخير ليك وبالأصلح ليك و مع البلاء ربنا بينزل لطف وصبر يخليك تتعرف على ربنا بشكل جديد يمكن مكنتش تعرفه بيه لولا البلاء ده.
وأم سيدنا موسى لما ألقت بابنها في الماء ربنا ربط على قلبها وصبرها علشان هو اعلم بالخير وصبرت وربنا جمعها بيه تاني (وأصبح فؤاد أم موسى فارغًا إن كادت لتبدي به لولا أن ربطنا على قلبها لتكون من المؤمنين).. يمكن ربنا ميجمعكش باللي بتحبه في الدنيا لحكمة هو يعلمها وهو العليم الحكيم لكن يجمعنا بيهم في الجنة في الحياه الحقيقية اللي مفيهاش ولا حزن ولا تعب ولا مرض ولا فراق (ولهم فيها ازواج مطهرة وهم فيها خالدون).
وأضافت، أي حد فقد شخص عزيز خليك عارف إن مش دي النهاية هو بس انتقل قبلك بشوية لحد ما انت كمان تخلص رسالتك في الأرض ومهما طال الوقت فهو برده قصير في الاخر هنقول ده اكنه كان يوم او اقل كمان ( يوم او بعض يوم ) ( وما أمر الساعة الا كلمح البصر أو هو أقرب)، يا ريت كلنا نعمل حساب اليوم ده و نبتدي نتعرف على ربنا بأسمائه وصفاته وجماله علشان يوم لما يجلنا اليوم ده يبقى اسعد ايام حياتنا ( الذين تتوفاهم الملائكة طيبين يقولون سلام عليكم ادخلوا الجنة بما كنتم تعملون ) ( قيل ادخل الجنة. قال يا ليت قومي يعلمون بما غفر لي ربي وجعلني من المكرمين ).
وأختتمت، أي حد اتغير بسبب هيثم أو أثر فيه يا ريت ياخد نيه أن أي عمل خير بيعمله أو تغيير يكون في ميزان حسنات هيثم وادعوله دايما ويارب يجمعنا بكل أحبابنا في الفردوس الاعلى بدون سابقة عذاب ولا عتاب ولا حساب.
